.png)
51 milionë eurot që do të investohen nga NATO në bazën ajrore të Kuçovës janë pjesë e programit të investimit të sigurisë të Aleancës ushtarake për rritjen dhe përmirësimin e infrastrukturës e logjistikës ushtarake të vendeve anëtare.
Zëdhënësi i NATO-s, Piers Cazalet, në një intervistë për Agjencinë Telegrafike Shqiptare thotë se pjesë e ndërhyrjes përmes shumës në fjalë është edhe ajo për përmirësimin e depove të furnizmit me karburant.
A do të thotë kjo që baza e Kuçovës do të shërbejë si një bazë tranzit për operacione të mundshme trajnuese, apo luftarake të trupave të NATO-s në rajon? Cazalet la të kuptohej që po, duke konfirmuar se Kuçova do të shërbejë si bazë mbështetëse për NATO-n për furnizim ajror; mbështetje logjistike; mbështetje për policimin ajror; si dhe trajnime dhe stërvitje të Aleancës.
Cazalet thotë se NATO i është mirënjohës Shqipërisë për kontributin e dhënë në luftën kundër terrorizmit dhe avokatisë për zgjerimin e aleancës me vende e Ballkanit.
“Vendi juaj është një avokat i fortë I politikës së dyerve te hapura të NATO-s dhe i integrimit të fqinjëve tuaj në familjen Euro-Atlantike”, thotë zëdhënësi i NATO-s Piers Cazalet për ATSH.
Baza ajrore e Kuçovës, ku pritet që puna për përmirësimin dhe rikonstruksionin e saj të nisë brenda këtij viti, do të shërbeje gjithashtu edhe si bazë kombëtare për Forcën Ajrore Shqiptare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
