Opozita ka vlerësuar konferencën e donatorëve në Bruksel për dhënien e 1,15 miliardë eurove, por në të njëjtën kohë ngre dyshimet se këto fonde nuk do të përdoren të gjitha për rindërtimin e zonave të prekura nga tërmeti. Kryetarja e Lëvizjes Socialiste për Integrim, Monika Kryemadhi deklaroi se konferenca e donatorëve tregoi se nuk ka asnjë lloj paragjykimi ndaj Shqipërisë dhe se pas këtij entuziazmi duhet të fillojë përgjegjësia dhe përgjegjshmëria e qeverisë “Rama” për të nisur sa më parë ndërtimin në zonat e prekura nga tërmeti.
“Për shqiptarët dhe shtëpitë në rindërtim do të shkojnë 265 milion euro, të cilat janë para që do t’i krijojnë mundësi për shqiptarët dhe familjet që kanë humbur shtëpitë e tyre, të mos vazhdojnë të paguajnë kreditë e kripura që janë ngritur pas tërmetit. Do të thotë që të ndërtohen sa më shpejt shtëpitë e tyre, që jo të dalë dimri i vitit tjetër, por edhe pranvera e këtij viti ata të hyjnë të lumtur në shtëpitë e tyre, sepse takimi i djeshëm ia dha këtë mundësi dhe shans që ata të jenë të qetë dhe të hyjnë sa më shpejt në shtëpitë e tyre”, theksoi Kryemadhi.
Në deklaratën e saj ajo theksoi se është shumë e nevojshme ngritja e një institucioni të monitorimit. “Sigurisht që buzëqeshja e kryeministrit tonë ishte shumë e madhe, sepse prej vitesh po kërkon për të marrë kredi nëpër bankat dhe institucionet ndërkombëtare për të paguar pagat dhe për të paguar shpenzimet administrative. Kishim një shumë prej 885 milion euro, të cilat janë në formë huaje, në formë borxhi që janë para që do t’i paguajnë shqiptarët me taksat dhe paratë tona, do ti paguajnë fëmijët e shqiptarëve. Prandaj është shumë e rëndësishme për të pasur një institucion monitorimi, të pavarur, me ekspertë që do të bëjnë monitorimin e të gjithë këtij projekti, sepse ajo që është edhe më e rëndësishme është që besimi i shqiptarëve te kjo qeverisje ka humbur”, theksoi Kryemadhi.
Ashtu si dhe PD-ja, edhe LSI-ja ka vlerësuar deklaratën e zyrtarit të DASH, Palmer ku bëri të ditur se SHBA do të themelojnë me paratë që kanë dhënë dje akademinë e transparencës, e cila do të ndihmojë Shqipërinë për administrimin në mënyrë transparente, llogaridhënëse të donacioneve të pas tërmetit dhe fondeve të tjera publike. Dhe kjo për shkak se shqiptarët janë mësuar që paratë e tyre nuk shkojnë më në shërbim të tyre, por në xhepat e qeveritarëve .
“Ajo që ne duam të theksojmë dhe është e rëndësishme për të gjithë ne, është që takimi i djeshëm ishte një takim shumë i rëndësishëm për t’u dhënë forcë dhe shpresë shqiptarëve që nuk janë vetëm në betejën e tyre përballë një grupi njerëzish, të cilët jo vetëm nuk ndjejnë dhembshuri për shqiptarët, por përkundrazi kërkojnë të përfitojnë nga fatkeqësia e shqiptarëve. Ne do të jemi të gatshëm dhe do të jemi vigjilentë për të ndjekur hap pas hapi çdo projekt që ka të bëjë me rindërtimin e shtëpive të shqiptarëve. Por jo vetëm të shtëpive, por edhe të shkollave, të kopshteve, të çerdheve, të kishave dhe xhamive, të cilat janë objekte që janë në shërbim të qytetarëve”, theksoi Kryemadhi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.