Gazeta Si - Kroacia është finalistja e parë e Ligës së Kombeve. Djemtë e trajnerit Zllatko Daliç kanë mundur 2-4 Holandën në shtëpinë e saj, në Roterdam. U deshën 120 minuta për të përcaktuar fituesin, pasi 90 minutat e kohës së rregullt përfunduan në barazim, 2-2.
Malen kaloi Holandën në avantazh, ndërsa në pjesën e dytë erdhi befasia për skuadrën e Ronald Koeman. Kramariç barazoi shifrat me një penallti të fituar nga Modriç, duke ndryshuar rrjedhën e lojës. Pashaliç realizoi golin e 2-të për skuadrën e Daliç dhe kur pritej që ajo të festonte kalimin në finale, Holanda barazoi me Lang, i futur në fushë si zëvendësues.
Bruno Petkoviç, edhe ky i aktivizuar si zëvendësues te Kroacia, shtangu sërish ‘Tulipanët’ me një goditje nga jashtë zonës në shtesën e parë. Në shtesën e dytë Kroacia ‘vulosi’ fitoren 2-4 me një tjetër penallti, këtë herë të shndërruar në gol nga Luka Modriç.
Zhgënjim për holandezët, të cilët konsideroheshin favoritë për fitimin e trofeut. Kroatët, të udhëhequr nga të zakonshmit Modriç dhe Brozoviç, e kanë merituar kalimin në finale, ku do të ndeshen me fituesin e çiftit tjetër gjysmëfinalist, Itali-Spanjë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.