Kreu i KLP, Alfred Balla në Vetting? Komisioneri Publik kërkon përjashtimin e tij nga sistemi për 15 vite (Vendimi në 21 maj)

Gazeta Si - Kolegji i Posaçëm i Apelimit (KPA), do të vendosë në 21 maj (ora 15:00), për ankimimin e Komisionerit Publik kundër vendimit të KPK (Komisioni i Pavarur i Kualifikimit), ndaj Alfred Ballës, kreut aktual të KLP-së (kreu i Këshillit të Lartë të Prokurorisë).

Sipas Komisionerit Publik, KPK ka vendosur ndërprerjen pa një vendim përfundimtar të procesit të Vettingut për Ballën për periudhën para 8 vitesh kur ka qenë ndihmës ligjor në Gjykatën e Lartë.

Komisioneri është dakord me ndërprerjen, por kërkon që për 15 vjet Balla të mos zgjidhet gjyqtar, prokuror etj., pasi lirimin e tij nga Gjykata e Lartë, pra vullnetin e tij e barazon me rastet kur magjistratët japin dorëheqje.

Gjatë seancës publike këtë të hënë, Alfred Balla e kundërshtoi kërkesën e komisionerit dhe e quajti ankimin si “antiligjor dhe të pakuptimtë nga ana ligjore”.

“Nuk e di nga është nisur Komisioneri të bëjë ankim, në cilën tavolinë”, - tha Balla.

Ballës i tërhoqi vëmendjen kryesuesja e trupës gjykuese Ina Rama, e cila tha se ai nuk mund të shprehte vlerësime personale.

Ndërkohë, pala mbrojtëse e Ballës, avokatja Etleva Sherifi argumentoi se Balla nuk mund të jetë Subjekt Rivlerësimi.

Sipas avokates, Ballës i ka mbaruar marrëdhënia e punës në vitin 2017 dhe kësisoj nuk mund të jetë subjekt, jo me dëshirën e tij, por ai është larguar nga Gjykata e Lartë asokohe.

Alfred Balla u zgjodh në KLP, si kandidat i propozuar nga shoqëria civile, ndërkohë që ai më herët ka mbajtur postin e këshilltarit ligjor të Gjykatës së Lartë në vitin 2007.

Ndërkohë që Komisioneri Publik ka ankimuar vendimin e Vettingut për Ballën, duke rikthyer në vëmendje se kreu i KLP nuk gëzon statusin e magjistratit.

Në përfundim të mandatit, Alfred Balla kërkon që të ushtrojë funksionin në një prej prokurorive të Apelit, por sipas Komisionerit Publik, kreut të KLP-së, i duhet hequr e drejta për 15 vite te ardhshme për të ushtruar funksione në sistemin e drejtësisë, pasi nuk gëzon statusin e magjistratit.

Bëhet fjalë për një precedent të hapur nga shkalla e parë e Vettingut që e përfshiu në rivlerësimin e trefishtë ndaj tij.

Ligji thekson se anëtarët e KLP apo KLGJ kur iu mbaron mandati, kanë të drejtën që të emërohen dhe të kenë funksione në sistemin e drejtësisë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.