Kosova nuk diskutoi për asnjë moment tri pikët në ndeshjen vendimtare ndaj Malit të Zi duke mbajtur vetë në dorë fatin e kualifikimit.
Rrahmani zhbllokoi rezultatin që në minutën e 10-të të takimit në stadiumin "Fadil Vokrri" të tejmbushur në Prishtinë.
Goli çoi peshë "Dardanët", por nuk u prit mirë nga tifozeria mike e paktë në numër. Grupi i vogël i tifozëve malazezë i izoluar nën masa të forta sigurie në një nga pjesët pas portave të stadiumit u përpoq të prishte festën e tifozëve të Kosovës, duke provokuar me kore raciste në serbisht dhe duke hedhur sende të forta në fushë.
Është dashur ndërhyrja e forcave speciale të policisë së Kosovës që tifozët miq të qetësoheshin, ndërkohë që tifozeria vendase nuk ra pré e provokimit për asnjë moment.
I zakonshmi Vedat Muriqi shënoi golin e sigurisë në minutën e 35-të, thuajse në të njëjtën kohë që Keidi Bare shënonte po golin e dytë për Shqipërinë në Moldavi.
Pjesa e parë u mbyll 2-0 dhe në të dytën direktivat e trajnerit Bernard Shalande duket se ishin më shumë kujdes në mbrojtje për të mos i lënë hapësira pas kundërshtarit, por pa harruar sulmin.
Kosova pati tre raste të tjera për gol, por traversa dhe fati ndalën përpjekjet e vendasve për golin e tretë.
Me këtë fitore Kosova mbetet në vendin e tretë në kuotën e 11 pikëve, një më pak se Çekia, me të cilën do të përballet në transfertë më 14 nëntor në ndeshjen vendimtare për kualifikimin.
Në ndeshjen tjetër të këtij grupi, Anglia u shfaq me tjetër fytyrë në transfertë ndaj Bullgarise në krahasim me ndeshjen e luajtur tri ditë më parë ndaj Çekisë në Pragë, ku humbën 2-1. "Tre luanët" përforcuan pozitat në krye të grupit me 15 pikë pas fitores 0-6 ndaj bullgarëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.