Gazeta Si - Një debat gjatë mbledhjes së Partisë Demokratike në Kurbin, ka degraduar deri në përdorimin e armës mbrëmjen e të hënës.
Ngjarja u regjistrua rreth orës 17:30, ku pas një konflikti mes nënkryetarit të PD, Kastriot Marku dhe kandidatit për primare të Kurbinit, Van Rica situata ka precipituar.
Ka qenë pikërisht 53-vjeçari Rica, i cili ka qëlluar me armë zjarri në korridoret e degës së PD në Laç, dhe më pas është larguar. Pas disa orësh në arrati, autori i dyshuar ka rënë në prangat e policisë.
Sipas burimeve paraprake, shkak i konfliktit ishte kërkesa për anëtarësime të reja të simpatizantëve që merrnin pjesë në votime.
Anëtari Van Rica kishte kërkuar anëtarësimin e simpatizantëve, por ajo u kundërshtua nga nënkryetarit të PD-së, Kastriot Marku.
Pas kësaj, ai ka qëlluar me armë zjarri në korridor e më pas është larguar. Nga të shtënat nuk pati të lënduar.
Rica, i cili rezulton të jetë punonjës i një policie private në Laç akuzohet për “Mbajtja pa leje e armëve, armëve shpërthyese dhe municionit”, "Kanosja” dhe “Prishja e qetësisë publike”.
Gjithashtu në cilësinë e provës materiale është sekuestruar një armë zjarri pistoletë me të cilën dyshohet të ketë qëlluar dhe gëzhojat e gjetura në vendin e ngjarjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.