.png)
Deputeti i PD-së, Luan Baçi, ka nxjerrë në pah problematikën që po ndodh në bazën e PD-së për primaret kur i referohet incidentit të Laçit, edhe pse rast i shkëputur sipas tij.
“Është shqetësuese, por çdo gjë e mirë ka edhe një të keqe. Primaret ishin risi dhe e kam mbështetur shumë fare. Është një nga zgjedhjet më të mira që ka bërë PD, në kushtet aktuale ku jemi. Rasti i Kurbinit është rast i veçantë, i shkëputur, tejet i rrallë. Është e pakonceptueshme, e papranueshme, por gjithmonë duhet të kemi parasysh një gjë të gjithë, duke e zbritur pushtetin në bazë, te anëtarësia, duke qenë në shumë raste pa logjistikën e duhur, pa zyra, pa dokumentacionin e saktë, ka edhe problematika të tilla.
Zotëria ka bërë një akt të papranueshëm duke mos pasur kushtet logjistike, mbaroi afati, s’ka pasur mundësi për t’i hedhur në sistem. Patjetër duhet të shoqërohet me një reagim të PD. Kjo duhet të shërbejë për të gjitha degët e tjera të PD, pasi në çdo degë ka mospërputhje afatesh, është normale në një proces zgjedhor, aq më tepër në një proces ku ka shumë kërkesa dhe emocion. Unë shikoj edhe të mirën, që ka një vrull njerëzish të spikatur që duan të garojnë nën siglën e PD” ka thënë Baçi në MCN.
Një debat gjatë mbledhjes së Partisë Demokratike në Kurbin, ka degraduar deri në përdorimin e armës mbrëmjen e të hënës.
Ngjarja u regjistrua rreth orës 17:30, ku pas një konflikti mes nënkryetarit të PD, Kastriot Marku dhe kandidatit për primare të Kurbinit, Van Rica situata ka precipituar.
Ka qenë pikërisht 53-vjeçari Rica, i cili ka qëlluar me armë zjarri në korridoret e degës së PD në Laç, dhe më pas është larguar. Pas disa orësh në arrati, autori i dyshuar ka rënë në prangat e policisë.
Sipas burimeve paraprake, shkak i konfliktit ishte kërkesa për anëtarësime të reja të simpatizantëve që merrnin pjesë në votime.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
