Gazeta Si - Ilir Beqaj, ish ministri i Shëndetësisë është paraqitur mëngjesin e kësaj marte në ambientet e Prokurorisë së Posaçme. Ai ndodhet aty që prej orës 09:00, ku do të merret në pyetje nga SPAK për aferën e koncesionit të sterilizimit.
Beqaj është me masë sigurie "detyrim paraqitje", në lidhje me këtë koncesion, i akuzuar për shpërdorim detyre.
Më herët, ai është paraqitur dy herë në SPAK për të zbatuar vendimin e masës së sigurisë "detyrim paraqitje".
SPAK ka zyrtarizuar hetimet ndaj Ilir Beqajt me masën e shtrëngimit të paraqitjes në policinë gjyqësore dhe ndalimin e daljes jashtë vendit, si person nën hetim për shpërdorim detyre në procedurat e koncesionit të sterilizimit të pajisjeve kirurgjikale.
Beqja është urdhëruar të paraqitet çdo të premte në Byronë Kombëtare të Hetimit, të mos largohet nga territori i Shqipërisë pa autorizimin e gjykatës si dhe i ndalohet përdorimi i pasaportës apo mjeteve të tjera identifikuese për daljen jashtë shtetit.
Ai është zyrtari më i lartë nën akuzë për shkeljet e konstatuara me kontratën e Partneritetit Publik-Privat të sterizilimit, pas arrestimit në gusht të këtij viti të biznesmenit Ilir Rrapaj dhe zëvendësit të tij në Ministrinë e Shëndetësisë, Klodian Rrjepaj.
Hetimi nga ana e SPAK për Beqaj vazhdonte prej tre vitesh për veprat penale “Shpërdorimi i detyrës” në bashkëpunim, “Shkelja e barazisë së pjesëmarrje në tendera apo ankande publike” kryer në bashkëpunim, si dhe “Korrupsioni pasiv i funksionarëve të lartë shtetëror ose i të zgjedhurve vendorë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.