Drejtori i Sekretariatit të Komunitetit të Energjisë Janez Kopac ka folur për përmbylljen e ankandit për të parin impiant fotovoltaik në Shqipëri.
“Mirëpresim ankandin e parë për mbështetjen e energjive të rinovueshme në Shqipëri dhe shpresojmë se e njëjta praktikë do të ndiqet edhe nga vendet e tjera që kanë të njëjtin status në kuadër të Komunitetit të Energjisë. Ankandet e energjisë së rinovueshme mundësojnë një garë konkuruese në procesin e garantimit të mbështetjes, duke sjellë çmime më të ulëta të energjisë së rinovueshme. Ky është një përfitim i qartë për konsumatorët e energjisë”, u shpreh drejtori Kopac.
Ankandi i energjisë të rinovueshme në Shqipëri u parapri me hapjen e një tjetër ankandi nga Mali i Zi për ndërtimin në një tokë shtetërore të një impianti me kapacitet të instaluar prej 250 MW, pa garanci blerjeje.
Konsorciumi fitues i garës do të ndërtojë të parin impiant të energjisë diellore në vend, në rajonin e Akernisë, në afërsi të qytetit të Vlorës. Sipas ankandit, 50 MW do të jenë me mbështetje pasi qeveria garanton blerjen me 0.0599/kwh për një periudhë 15 vjeçare, çka është më ulët se sa çmimi bazë i energjisë apo ai i pikut referuar Bursës Hungareze të Energjisë (HUPX), referenca për çmimet e importit në rajon, regjistruar në Gusht dhe Shtator 2018. Një sasi tjetër prej 50 MË, pa mbështetje, do të shitet me çmimet e tregut.
Në mars 2018, Sekretariati i Komunitetit të Energjisë bashkë me Bankën Europiane për Rindërtim e Zhvillim dhe Agjencinë Ndërkombëtare për Energjinë e Rinovueshme publikuan udhëzimet për të ndihmuar shtetet e ndryshme në projektimin dhe implementimin e proceseve konkuruese në mbështetje të energjive të rinovueshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.