.png)
Nuk do të ketë asnjë tender për kolaudimin e automjeteve. Ministria e Infrastrukturës ka vendosur të mos e rinovojë kontratën për koncesionarin e kolaudimit të automjeteve.
Këtë e bën me dije për gazetën “Si” Ministria e Infrastrukturës.
Ajo thotë se shërbimi do ti kalojë shtetit nga muaji janar i 2021, pra DPSHTRR-së dhe për këtë ka një udhëzim të brendshëm se si do të funksionojë mandej shërbimi.
Ministria zbulon për gazetën Si gjithashtu se përmes një shkrese drejtuar kompanisë SGS e cila ofron shërbimin dhe afatin e ka deri në 31 dhjetor 2021, i ka kërkuar asaj të nisë dorëzimin e paisjeve, të cilat do të administrohen nga Drejtoria e Përgjithshme të Transportit Rrugor.
“Pra ministrja i ka kërkuar SGS që të dorëzojë mjediset dhe infrastrukturën te DPSHTRR. Nuk ka hap tjetër deri tani”- bënë me dije nga Ministria për gazetën “Si”.
Kontrata koncesionare e kolaudimit të automjeteve e lidhur me kompaninë SGS përfundoi afatin 10-vjeçar në shtator të vitit 2019, por qeveria vendosi ta shtyjë edhe me 16 muaj të tjerë vlefshmërinë e saj deri më 31 dhjetor të këtij viti.
Ka patur shumë debate ndër ekspertë dhe përfaqësues të politikës që e kanë kundërshtuar dhënien e këtij shërbimi me koncesion duke u qasur se duhet ta ofrojë shteti.
Tregu i kolaudimit sipas të dhënave qarkullon rreth 8 milion euro në vit teksa ndërkohë që numri i automjeteve në qarkullim ka ardhur gjithnjë në rritje.
Kryeqyteti mbart numrin më të lartë të automjeteve në vend, duke pasur brenda tij 31 % të automjeteve që ndodhen në mbarë vendin. Referuar shifrave të Open Data, në total në Shqipëri janë 578 mijë e 638 automjete pasagjerësh dhe mallrash.
Pjesa më e madhe e automjeteve është në Tiranë, 179 mijë e 167 të tilla ose 31 % e automjeteve që ka vendi.
Të dhënat e publikuara janë deri në vitin 2018. Nga 179 mijë e 167 mjete, automjete pasagjerësh në Tiranë janë 158 mijë e 234 ose 88 % e tyre. Pjesa më e madhe janë autovetura (144 mijë e 363), ndërsa pjesa tjetër janë autobuzë e mikrobuzë (2 mijë e 73), motoçikleta e triçikla (11mijë e 784) dhe kampera (14).
Në kryeqytet janë edhe 20 mijë e 933 automjete mallrash nga të cilat 18 mijë e 570 janë kamionë dhe traktorë rrugorë, 46 janë makineri bujqësore, 2 mijë e 82 janë rimorkio dhe 235 janë makineri teknologjike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
