Raporteri i Përgjithshëm i Asamblesë Parlamentare të Këshillit të Europës për lirinë e medias dhe mbrojtjen e gazetarëve, Stefan Schennach i kërkoi qartësisht qeverisë shqiptare që të mos vijojë me planet për të miratuar të ashtuquajturën "Paketa Antishpifje".
“Ligji i propozuar nga Kryeministri i Shqipërisë si një “paketë antishpifje” synon të krijojë një organ administrativ me fuqi për të urdhëruar mediat të heqin lajmet mbi çështje të tilla si “cenimi i dinjitetit të individit”, nën kërcënimin e gjobave të rënda. Është e dukshme se një ligj i tillë do të ketë efekt frikësues mbi lirinë e medias për shkak të termave shumë të gjerë,” tha raporteri austriak i KiE.
Reagimi i Schennach pasoi atë të ambasadorit të BE-së në Tiranë Luigi Soreca, por Schennach është më i drejtpërdrejtë.
Schennach thotë se rekomandimet e Venecias kërkojnë një rishikim të thellë të nismës, ndërsa dyshon se mazhoranca mund të bëjë disa ndryshime estetike duke mos prekur thelbin e ligjit.
“Për rrjethojë, unë nxis parlamentin e Shqipërisë të heqë dorë nga propozimi aktual dhe të rinisë të gjithë procesin", propozon ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.