Këshilli i BE-se do të propozojë hapjen me kushte të negociatave me Shqipërinë. Kushtet e vendosura në draft-konkluzionet e Këshillit për Shqipërinë dhe Maqedoninë e Veriut, ngjasojnë me ato të Bundestagut gjerman.
BE-ja i ka vënë qeverisë kushte që lidhen me reformën në drejtësi dhe reformën zgjedhore. Po ashtu Këshilli inkurajon klasën politike të zgjidhë ngërçin politik.
“Partitë e opozitës duhet të rindërtojnë në mënyrë konstruktive në institucionet demokratike. Të gjithë aktorët politikë duhet të angazhohen në axhendën e reformës në BE dhe të dialogojnë për të kapërcyer polarizimin politik”, shkruhet në draft.
Sipas draftit, para konferencës së parë ndërqeveritare, e cila duhet të zhvillohet jo më vonë se në gjysmën e parë të vitit 2020, në varësi të progresit të bërë, Shqipëria duhet të sigurojë:
- Funksionimin e Gjykatës Kushtetuese dhe Gjykatës së Lartë.
- Nisjen e hetimeve ndaj gjyqtarëve dhe prokurorëve të dyshuar për sjellje kriminale si rezultat i gjetjeve nga procesi i vetting-ut.
- Hetim rasteve dhe akuzave për krim elektoral.
- Ngritja dhe funksionimi i SPAK.
- Rezultate konkrete në luftën kundër korrupsionit dhe krimit të organizuar, përfshirë zyrtarët e nivelit të lartë.
- Të miratojë reformën zgjedhore në përputhje me rekomandimet e OSBE / ODIHR.
- Të zbatohet vendimi i Gjykatës Kushtetuese për zgjedhjet lokale të 30 qershorit 2019”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.