Kërkoi dorëzimin e dosjes nga SPAK pa paguar tarifën, GJKKO rrëzon kërkesën e Ilir Beqajt

Gazeta Si - Gjykata e Posaçme kundër Korrupsionit dhe Krimit të Organizuar ka rrëzuar kërkesën e ish-ministrit të Shëndetësisë Ilir Beqaj për të tërhequr pa asnjë tarifë pages dosjen hetimore të SPAK për koncesionarin e sterilizimit, çështje në të cilën vetë është nën hetim.

Beqaj kishte kërkuar që të shikonte aktet hetimore të kësaj dosje, por SPAK kishte vendosur një shumë prej 1.2 milionë lekësh të vjetra si taksë për ta tërhequr dosjen.

Ilir Beqaj nuk pranoi edhe kërkoi nga gjykata që dosjen ta tërheqë pa asnjë pagesë.

“Personi nën hetim Ilir Beqaj, më datë 21.02.2024 ka paraqitur pranë Gjykatës kërkesën me objekt: Detyrimin e Prokurorisë së Posaҫme kundër Korrupsionit dhe Krimit të Organizuar, që të vendos në dispozicion të z.Ilir Beqaj si “person nën hetim”, pa kurrfarë detyrimi monetar nga ana e tij për shërbimin e skanimit, të akteve të deritanishme të dosjes hetimore që lidhet me procedimin penal Nr. 13, të vitit 2020, në kuadër të garantimit të së drejtës së tij kushtetuese dhe ligjore për t’u njohur me aktet e dosjes hetimore në ngarkim të tij”, thuhet në vendimin e GJKKO.

Në përfundim, gjykata e rrëzoi kërkesën e Ilir Beqajt si të pabazuar në ligj për të marrë falas dosjen me aktet hetimore të SPAK për hetimin e koncesionit të sterilizimit.

Kështu, ish-ministri Beqaj do të duhet të paguajë tarifën për të tërhequr dosjen. Megjithatë, vendimi i GJKKO mund të apelohet.

Ish-ministri po hetohet nën masë sigurie “detyrim paraqitje dhe ndalim i daljes jashtë shtetit” për shpërdorim detyre dhe shkelje e barazisë së pjesmarrësve në tendera apo ankande publike, vepra penale të kryera në bashkëpunim për aferën e "Sterilizimit".

Ndërsa Beqaj zbaton masën që ka dhënë SPAK, një hetim paralel ka nisur për të, për dyshimet që kanë të bëjnë me fondet e huaja, koordinuar nga SASPAC, Agjencia Shtetërore e Programimit Strategjik dhe Koordinimit të Ndihmës, ku Beqaj ka qenë drejtor. SPAK dyshon se Beqaj ka kryer veprat e shpërdorimit të detyrës dhe korrupsionit.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.