.png)
Gazeta Si – SPAK ka përfunduar hetimet dhe ka dërguar në gjykatë dosjen ndaj 44-vjeçarit rus, Vladislav Urban, i akuzuar për kërcënimin e shpërthimit të një bombe në aeroportin e Rinasit. Urban është marrë i pandehur në mungesë për “kanosje për kryerjen e veprave me qëllime terroriste”.
Sipas SPAK, në shkurt 2023, rusi ka dërguar një mail në adresën e Shefit Operacional të Rinasit, ku kërcënonte me shpërthimin e një bombe nëse qeveria shqiptare nuk njeh Kosovën si pjesë të Serbisë, si edhe pretendonte te kishte marrë peng 2 shqiptarë.
Hetimi zbuloi se dërguesi ishte Vladislav Urban, i lindur në Moskë, Rusi dhe banues në Selanik, Greqi. Përmes bashkëpunimit me homologët grekë, autoritetet mësuan se 44-vjeçari jetonte i vetëm në adresën e deklaruar në e-mail, vuante nga probleme të shëndetit mendor dhe nga verifikimet e kryera, nuk rezultonte të mbante peng ndonjë person.
Një muaj përpara e-mailit për Rinasin, Urban dyshohet se kishte dërguar mesazhe të ngjashme në aeroportin e Athinës dhe në një spital në Greqi, ku kërcënonte se do të vriste qytetarë grekë. Sipas hetimit, 44-vjeçari nuk ka asnjë hyrje-dalje në territorin shqiptar.
Për drejtësinë shqiptare, Vladislav Urban ka një masë sigurie “arrest në burg”, të dhënë në mungesë, ndërsa pritet vijimi i procesit gjyqësor ndaj tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje