.png)
“Jeta është këtu, për mua dhe për ty”. Ky është mesazhi i fundit i shkruar në rrjetet sociale nga këngëtarja çeke, Hana Horka, para se të vdiste dy ditë më parë si pasojë e një vendimi të pamatur që i kushtoi shtrenjtë.
Këngëtarja 58-vjeçare kishte vendosur më 13 janar të infektohej vullnetarisht me COVID-19, nga disa familjarë që kishin rezultuar pozitivë. Sipas saj, në mesazhin e postuar, kjo do t’i mundësonte asaj rikthimin në jetën normale, ku mund të shkonte sërish në kinema, teatër, ose të udhëtonte jashtë vendit, diçka e pamundur për ato që si Horka refuzojnë kategorikisht të vaksinohen.
Pjesëtarja e grupit Asonance rezultoi në ditët në vijim e infektuar me variantin Delta, dhe si pasojë e saj ndërroi jetë shumë shpejt, më 16 janar, siç e zyrtarizoi vetë grupi i muzikës popullore, të cilit i përkiste.
Dhimbja e djalit
Djali i saj Jan Rek, edhe ai muzikant, akuzoi drejtpërdrejt skeptikët ndaj masave kundër pandemisë që rrethonin të ndjerën, që sipas tij e kishin bindur se sëmundja do të kalonte vetë.
Gjithashtu Jan, në një intervistë me gazetën çeke Irozhlas.cz, kritikoi ashpër No vax dhe përhapësit e lajmeve të rreme mbi pandeminë. “Ju ma vratë nënën. Ajo nuk do të mund të vijë në diplomimin tim, në dasmën time apo në pagëzimin e djalit tim”, është shprehur ai, duke shpjeguar se si ai dhe babai i tij ishin përpjekur ta bënin Hanën të vaksinohej dhe dështuan.
Në Republikën Çeke, të infektuarit nga fillimi i pandemisë janë më shumë se 2 milionë e 600 mijë, ndërkohë që viktimat janë rreth 37 mijë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
