.png)
Gazeta Si - Numri i të vdekurve në Dernan e shkatërruar nga përmbytjet mund të arrijë në 20,000, sipas kryebashkiakut të qytetit lindor të Libisë që pësoi goditjen më të rëndë nga kalimi shkatërrues i stuhisë “Daniel”.
“Të dyja qeveritë i bënë thirrje komunitetit ndërkombëtar për ndihmë”, i tha rrjetit britanik Tawhid Pasha nga Organizata Ndërkombëtare për Migracionin.
“Qeveria e Unitetit Kombëtar [qeveria perëndimore] ka ofruar mbështetjen e saj dhe po koordinon veprimet e saj me qeverinë në lindje. Sfida tani është se si komuniteti ndërkombëtar do t’i përgjigjet nevojave dhe kërkesave të qeverive”, tha ai.
Autoritetet lokale dhe shërbimet e urgjencës në Libinë lindore dje i bënë thirrje komunitetit ndërkombëtar për ndihmë, duke paralajmëruar se vendi nuk ka infrastrukturën e nevojshme për t’u përballur me një fatkeqësi të kësaj shkalle.
Kryebashkiaku i Dernas, tha se ekipet e shpëtimit nga Egjipti, Tunizia, Emiratet e Bashkuara Arabe, Turqia dhe Katari kanë mbërritur në zonë.
“Në fakt, ne kemi nevojë për ekipe të specializuara në rikuperimin e trupit. Kam frikë se në qytet do të bjerë një epidemi, për shkak të numrit të madh të të vdekurve nën rrënoja dhe në ujë” , tha ai.
Shkatërrimi në Derna është i dukshëm nga lart, qendra e qytetit dikur me popullsi të dendur, e ndërtuar përgjatë një shtrati të thatë lumi, tani është kthyer në një hapësirë të gjerë dhe të sheshtë toke me baltë.
Ndërtesat nuk janë më aty, ato më të lartat u shembën dhe familje të tëra, që flinin brenda, nuk arritën të shpëtonin.
Asnjë agjenci nuk ka publikuar një numër përfundimtar, por të gjithë pajtohen se numri i të vdekurve është me mijëra, të paktën 20 mijë.
Hissem Abu Skiwat, ministër i aviacionit civil në qeverinë lindore të Libisë, i tha agjencisë së lajmeve "Reuters", se më shumë se 5,300 trupa ishin numëruar dhe ky numër mund të dyfishohet. “Deti po i kthen vazhdimisht kufomat”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
