.png)
Gazeta Si – Juventusi është tërhequr nga projekti i Superligës. Klubi italian u ka dërguar një letër zyrtare Barcelonës dhe Real Madridit, me të cilën u komunikon se kërkon të bisedojë për daljen e mundshme nga projekti.
Klubi bardhezi, gjatë drejtimit të Andrea Anjelit, ishte një nga më aktivët për dhënien jetë të idesë që tërboi UEFA-n. Dyshimet për përjashtimin e mundshëm nga kupat e Europës për sezonin e ri nga organi që drejton futbollin europian, si pasojë e telasheve me drejtësinë sportive italiane, e kanë detyruar Juven të shohë një pozicion tjetër në lidhje me çështjen dhe të informojë zyrtarisht dy klubet spanjolle, që janë ende pjesë e projektit.
"Juventus Football Club S.p.A. informon për komunikimin e dy klubeve të tjera, që si Juventusi, nuk kanë ushtruar të drejtën e tërheqjes nga projekti i Superligës (Barcelona dhe Real Madrid), që të nisin një fazë diskutimesh mes të treve për daljen e mundshme të Juventusit nga ky projekt”, - shkruhet mes të tjerash në komunikatën e klubit.
UEFA ka hapur një hetim për Juventusin në lidhje me shkeljet që ka bërë klubi italian, që e ka marrë një dënim nga drejtësia sportive italiane. Një situatë kjo që me siguri ka ndikuar në tërheqjen e këtij klubi nga Superliga, pavarësisht se në komunikatë thuhet se nuk ka pasur asnjë kërcënim nga UEFA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
