Gazeta Si – Goli i Joselu i ka dhuruar finalen e Ligës së Kombeve Spanjës, që ka mundur 2-1 Italinë dhe tani përballet me Kroacinë. Skuadra e Mançinit luan për vendin e 3-të me Holandën.
Spanja është finalistja e dytë e Ligës së Kombeve. Iberikët e drejtuar nga trajneri Dela Fuente fituan 2-1 gjysmëfinalen e dytë dhe do të diskutojnë trofeun ditën e diel kundër Kroacisë së Luka Modriç.
Ndeshja e luajtur në Enschede u vendos nga goli i Joselu. Italia e nisi shumë keq ndeshjen, ku një gabim i Bonuçit vetëm pas 4 minutash solli golin e parë të spanjollëve me Jeremi Pino. Italianët barazuan në minutën e 10-të me një penallti të fituar nga Xaniolo dhe të kthyer në gol nga Imobile.
Vetëm 2 minuta para fundit të ndeshjes Joselu gjeti goditjen fituese, që çoi Spanjën në finale. Liga e Kombeve nuk ka përfunduar ende as për djemtë e Mançinit, pasi të dielën pasdite do të ndeshen me Holandën për vendin e 3-të në edicionin e 3-të të këtij kompeticioni.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.