Racizmi është një nga çështjet më delikate të futbollit të sotëm. Është në qendër të vëmendjes dhe FIFA e UEFA paralajmërojnë vazhdimisht masa drastike për ndalimin e këtij fenomeni, por ndryshe mendon ish-futbollisti i Barcelonës dhe Mançester Sitit, Jaja Ture, i cili aktualisht luan në kampionatin kinez me Quingdao Huanghai.
Për temën e racizmit ai ka folur për “L’Èquipe”, ku thekson se nga institucioni që drejton futbollin botëror ka vetëm fjalë, pasi as që i intereson fenomeni. “Mendoj se është një turp i madh. Flitet gjithmonë, bla, bla bla… por çfarë ndodh? Nuk ndryshon asgjë. Njerëzve të FIFA-s nuk u intereson aspak çështja e racizmit në futboll. Vetëm flasin dhe çdo gjë vazhdon si më parë. Jam i indinjuar nga ky fakt, sepse personalisht më bezdis shumë”, - ka thënë mes të tjerash lojtari nga Bregu i Fildishtë.
![](https://gazetasi.al/wp-content/uploads/2019/10/ture.jpg)
Në fakt, nuk janë marrë masa drastike ndaj këtij fenomeni që prek gjithë futbollin, edhe pse kohët e fundit janë evidentuar disa raste të rënda. Në Itali, për shembull, Dalbert, Lukaku dhe Vieira janë episodet më të fundit. Një iniciativë ndryshe ishte ajo e futbollistëve të kombëtares angleze, të cilët vendosën para ndeshjes eliminatore em Bullgarinë se në korin e parë racist do të linin fushën. Dhe ashtu bënë në dy momente të ndeshjes. FIFA vazhdon të “predikojë” luftë të ashpër ndaj sjelljeve raciste në stadiume, por, siç pohon edhe Jaja Ture, nuk ka masa drastike për çrrënjosjen e këtij fenomeni.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.