.png)
Nga Gazeta 'Si'-Pas vrasjes së tre ushtarëve izraelitë nga raketat e Hamasit në vendkalimin Kerem Shalom, ushtria izraelite ka urdhëruar banorët e Rafahut lindor që të "evakuohen menjëherë".
Ky urdhër vjen një ditë pasi ministri i mbrojtjes i vendit u tha trupave brenda Gazës që të prisnin "aksione intensive në të ardhmen e afërt në Rafah dhe në vende të tjera në të gjithë Rripin”, sepse sipas tij Hamasi nuk ka ndërmend të arrijë një marrëveshje mbi pengjet dhe një armëpushim.
Ushtria izraelite u ka thënë palestinezëve që të evakuojnë përkohësisht pjesë të Rafahut për në zonat humanitare duke sinjalizuar se një pushtim tokësor ishte i pashmangshëm.
"Për sigurinë tuaj, Ushtria e Mbrojtjes ju kërkon që të evakuoheni menjëherë në zonën e zgjeruar humanitare në pikat e kontrollit", tha Avichay Adraee, kreu i divizionit të mediave arabe të Njësisë së Zëdhënësit të IDF-së.
Adraee bëri "një thirrje urgjente" për njerëzit që banonin në "komunën e Al-Shaëka dhe në lagjet - Al-Salam, Al-Jneina, Tiba Zaraa dhe Al-Bayouk në zonën Rafah".
Një zëdhënës i IDF tha në një konferencë të hënën(6 maj) se ishte një "operacion me shtrirje të kufizuar për evakuim të përkohshëm" dhe "jo evakuim në shkallë të gjerë".
Izraeli ka sinjalizuar vazhdimisht plane për të dërguar trupa në Rafah, një qytet jugor në kufirin me Egjiptin, ku më shumë se një milion palestinezë të zhvendosur besohet se janë strehuar që nga 7 tetori.
Nga ana tjetër një zyrtar i lartë i Hamasit ka thënë se urdhri i evakuimit të Izraelit në Rafah është një “përshkallëzim i rrezikshëm”.
Sami Abu Zuhri i tha agjencisë së lajmeve Reuters se kjo do të ketë pasoja, por nuk dha më shumë detaje me veprimet që do të ndërmerren.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
