Izraeli po hedh themelet për të qëndruar gjatë në zona të Rripit të Gazës, Libanit dhe Sirisë

Gazeta Si – Ministri izraelit i Mbrojtjes, Israel Katz tha të mërkurën se ushtria izraelite do të qëndrojë në pjesët e Rripit të Gazës, Libanit dhe Sirisë që ka pushtuar për një vit e gjysmë të fundit, pavarësisht se çfarë ndodh (përfshirë nëse arrihen marrëveshje për t’i dhënë fund luftërave në vazhdim).

Në thelb ai vërtetoi me fjalë atë që është parë prej kohësh në terren: sidomos në territoret kufitare ushtria po shkatërron ndërtesa, po shtron rrugë dhe po ndërton struktura ushtarake. Me pak fjalë, po hedh themelet për të qëndruar atje në një afat të gjatë.

Nuk është plotësisht e qartë se sa territore ka pushtuar Izraeli në këtë mënyrë, edhe pse këto zona janë efektivisht të paarritshme për civilët dhe gazetarët.

Një ekspert nga Universiteti Ben Gurion në Jeruzalem i kontaktuar nga “Associated Press” pohon se Izraeli ka pushtuar ushtarakisht të paktën 50 për qind të Rripit.

Një tank i ushtrisë izraelite pranë Linja Alfa, që ndan Lartësitë Golan të aneksuar nga Izraeli nga Siria, në qytetin Majdal Shams

Zyra e Kombeve të Bashkuara për Koordinimin e Çështjeve Humanitare, vlerëson se afërsisht 69 për qind e Rripit të Gazës është nën urdhrat e evakuimit nga ushtria izraelite ose është e paarritshme për civilët palestinezë.

Që nga fillimi i pushtimit të Rripit të Gazës, pas sulmeve të Hamasit të 7 tetorit 2023, Izraeli ka krijuar një të ashtuquajtur “zonë koridor” në pjesën kufitare midis Izraelit dhe Rripit.

Fillimisht, “zona tampon” shtrihej brenda territorit të Rripit për rreth 300 metra. Ndërsa lufta vazhdoi, ajo u zgjerua gradualisht dhe marsin e kaluar, pas përfundimit të armëpushimit dhe rifillimit të sulmeve izraelite në Rrip, ajo arriti në periferi të dy qyteteve të rëndësishme: Gazës, në veri dhe Rafahut, në jug.

Një qytet në Rripin verior, Beit Hanun, u zhyt plotësisht. Por, të flasësh për një “zonë tampon” tani është e papërshtatshme.

A map of the Gaza Strip issued by the United Nations office shows that 65% of the Gaza Strip are considered “no movement” areas or under active evacuation orders. pic.twitter.com/DbYyv4yifV
— Abdulaziz Mohammed (@abdazizmo7amd) April 7, 2025

Pak ditë më parë, shoqata “Breaking the Silence”, e cila mbledh së bashku ish-anëtarë të forcave të armatosura izraelite, publikoi një raport mbi përvojat e ushtarëve në “zonat tampon”.

Disa prej tyre thonë se kanë marrë urdhra shumë specifike nga eprorët e tyre: të shkatërrojnë gjithçka që kanë gjetur para tyre.

“Ndërtesa banimi, serra, kasolle, ferma: çdo gjë duhej shembur”, tha, për shembull, një rreshter major, i cili mbeti anonim si të gjithë njerëzit e përmendur në raport.

“Ky ishte urdhri. Udhëzimi ishte që asgjë të mos lihej në këmbë përveç shkollave të UNRWA-s dhe objekteve të vogla të ujit”.

UNRWA është agjencia e Kombeve të Bashkuara përgjegjëse për ofrimin e ndihmës humanitare për refugjatët palestinezë.

Israel controls more of Gaza than at any point during the war, part of a plan that officials increasingly describe as leading to a full military occupation.

🔗: https://t.co/7vklC5CtfB pic.twitter.com/Ly9eIdJwC7
— Bloomberg Graphics (@BBGVisualData) April 14, 2025

Një rreshter tjetër i intervistuar nga “Breaking the Silence” tha se më parë në disa pjesë të “zonave tampon” pranë Rripit kishte “ara ose korije të kultivuara”.

Pasi ushtria izraelite kaloi aty me mjete të rënda ushtarake, pati “rërë, duna dhe shkatërrim”. “Ishte shumë e qartë për mua se çfarë po ndodhte, ne po marrim pjesë të Rripit”, – shtoi ai.

Izraeli pretendon se “zonat tampon” shërben për qëllime sigurie dhe për të parandaluar sulmet e mundshme në tokën izraelite.

Është i njëjti argument që ndër vite ka përdorur për të justifikuar pushtimin e paligjshëm të zonave të mëdha të Bregut Perëndimor, një territor që sipas shumicës dërrmuese të komunitetit ndërkombëtar i përket palestinezëve.

Sot, më shumë se 500,000 njerëz jetojnë në vendbanimet izraelite të ndërtuara në territoret e pushtuara të Bregut Perëndimor.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.