Gjykata e Katanias ka dënuar me 15 vite burg Moisi Habilajn, nga 18 që kërkoi prokuroria italiane për akuzën se drejtonte një grup të strukturuar kriminal me veprimtari trafikun e drogës nga Shqipëria në Itali.
Nazer Seitaj, i konsideruar si “llogaritari” i bandës është dënuar me shtatë vite burg, ndërkohë që edhe persona të tjera, shtetas shqiptarë dhe italianë kanë marrë disa vite burgim për akuzën e trafikut të drogës.
Në dosjen në fjalë doli edhe emri i ish-ministrit të Brendshëm, Saimir Tahiri, kushëri me Habilajt. Autoritetet italiane nuk hetuan Tahirin, por ndaj tij ka nisur një proces gjyqësor në Shqipëri, seanca e radhës e të cilit ishte parashikuar për këtë të mërkurë.
Seanca u shty, ndërkohë që vetë Saimir Tahiri, që e cilëson një proces farsë dhe të motivuar politikisht kërkoi që të zhvillohet gjyqi sa më parë.
“Kjo historia ime lindi si një proces politik dhe kur them i komanduar kam parasysh politikën, krimin dhe drejtësinë që janë aq bashkë sa ç’është dhe ati, biri dhe shpirti i shenjtë. Nuk janë ndarë ende dhe unë po e shoh”, deklaronte ai në fund të muajit shkurt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.