.png)
Gazeta Si - Gjykata e Posaçme me kërkesë të SPAK, ka sekuestruar apartamentin që ish-kryebashkiaku i Lushnjës, Fatos Tushe zotëronte në zonën e Lugomares në Vlorë.
Tre ditë më parë, Fatos Tushe u paraqit në SPAK, ku shkak ishte fshehja e një apartamenti që ky i fundit zotëronte në Vlorë.
Në njoftimin e publikuar sot (13 prill), bëhet me dije se është vendosur nën sekuestro apartamenti me sipërfaqe 75.3 m2 që Tushe ka në Lungomare të Vlorës.
“Caktimin e masës së sigurimit pasuror “sekuestro preventive”, parashikuar nga neni 274 i Kodit të Procedurës Penale, mbi pasurinë e paluajtshme të identifikuar si “Pasuria Nr. 40/267/4+1-21, Z.K 8602, lloji i pasurisë “apartament”, me sipërfaqe 75.3 m2, me vendodhje në Lungomare, Vlorë”– thuhet në njoftim.
Mësohet se apartamenti figuronte nën emrin e një kompanie ndërtimi, por realisht ishte nën zotërimin e Tushes dhe ky i fundit nuk e kishte deklaruar në formularin e deklarimit të pasurisë.
Ish-kryebashkiaku u shpall fajtor gjatë një hetimi të SPAK, për shkak të shpërdorimit të detyrës mbi tenderat dhe u dënua me tre vjet e katër muaj burgim si dhe heqje të të drejtës për të ushtruar funksione publike për 5 vjet.
Në fakt, këtë dënim ai e ka shlyer tashmë falë edhe gjykimit të shkurtuar. Tushe u vu në pranga në verën e 2021 bashkë me disa vartës të Bashkisë së Lushnjës me dyshimet se kishin abuzuar me tenderat dhe fondet publike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
