.png)
Drejtuesit e Interit dua ta mbyllin sa më parë marrëveshjen me mbrojtësin e Kombëtares, Marash Kumbulla, i kërkuar edhe nga shumë klube të tjera me emër. Sipas “Corriere della Sera”, Marota dhe Auzilio e kanë rritur presion dhe së fundi kanë takuar edhe agjentin e futbollistit të Veronës, Xhani Vitali, me të cilin kanë biseduar për përshpejtimin e transferimit të Kumbullës në Milano.
Konkurrenca për Kumbullën është shtuar shumë dhe drejtuesit e klubit zikaltër duan t’i paraprijnë situatës, pasi e duan me çdo kusht në ekip mbrojtësin 20-vjeçar kuqezi. Për shkodranin vazhdojnë të këmbëngulin edhe Napoli dhe Lacio. Madje, De Laurentis kishte arritur një akord me kolegun Seti për 21 milionë euro, plus 4 milionë euro bonuse. Por vetë Kumbulla nuk kishte dëshirë për të kaluar te Napoli dhe marrëveshja nuk u konkretizua.
Pas refuzimit të Napolit nga mbrojtësi shqiptar duket se qëndron pikërisht Interi, që nuk do t’i shpëtojë nga duart Kumbulla, ndaj dhe përfaqësuesit e tij kanë takuar shpesh njerëzit e afërt të lojtarit për t’ua bërë të qartë se ai do të ketë një rol të rëndësishëm në projektin e trajnerit Antonio Konte. Por kujdes nga Igli Tare, drejtori sportiv i Lacios, i cili ka bërë lëvizjet e veta për patriotin e tij. Për mbrojtësin e Kombëtares shqiptare ka interesim edhe nga Fiorentina, por edhe nga klubet më të mëdha në Gjermani.
E gjitha kjo situatë i shtyn drejtuesit e Interit që të bëjnë çdo lëvizje që në këtë moment për të mbyllur marrëveshjen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
