.png)
Gazeta Si – Davide Pecorelli, biznesmeni italian, i cili inskenoi vdekjen e tij në Pukë disa vite më parë për t’u shpëtuar borxheve, do të ekstradohet në Shqipëri.
Gjykata e Apelit e Peruxhias i dha “dritën jeshile” në maj të vitit të kaluar ekzekutimit të urdhër-arrestit ndërkombëtar të lëshuar më 2 tetor 2022 nga Gjykata e Shkodrës, e cila e dënoi me 4 vite burg Pecorelli-n me akuzën e mashtrimit, zjarrvënies dhe mashtrimit.
Por të premten, ministri italian i Drejtësisë, Carlo Nordio, ka miratuar përfundimisht ekstradimin e tij në Shqipëri.
Biznesmeni, duke folur për mediat italiane, ka thënë: “E pranoj, por jam seriozisht i shqetësuar për katër fëmijët e mi, dy prej të cilëve janë të mitur, babai im 90-vjeçar dhe vëllai im 60-vjeçar jan të dy me aftësi të kufizuara. Ky ekstradim në Shqipëri është një padrejtësi e madhe. Dorëzimi në Shqipëri për këto krime, edhe përballë ngjarjeve të tjera të fundit, më bën të ndihem qytetar i dorës së dytë”.
Biznesmeni u zhduk në janar të vitit 2021 në Pukë, ku gjet e djegur makina që ai kishte marrë me qira, brenda së cilës u zbuluan edhe mbetje skeletore.
E teksa autoritetet italiane dhe ato shqiptare ngritën alarmin për të mësuar se çfarë kishte ndodhur me biznesmenin, më 17 shtator ai u gjet shëndoshë e mirë.
Analizat e ADN-së zbuluan se skeleti i gjetur i djegur në makinë, i përkisnin një tjetër personi dhe jo pemës gjenetike të familjes Pecorelli.
Ndërkohë që autoritetet italiane e shqiptare hetonin ngjarjen, në shtator të 2021-it, Pecorelli u shfaq për mrekulli në një gomonte pranë ishullit Montecristo, duke i habitur të gjithë edhe me historinë e tij mbi zhdukjen 9 mujore.
“Po kërkoja një thesar”, deklaroi ai për autoritetet, duke shokuar jo pak autoritetet. Por hetimet zbuluan se shkak për zhdukjen e tij mund të kenë qenë borxhet e shumta që ai kishte për biznesin e tij të parukerisë së bashkëshortes me origjinë shqiptare.
Pecorelli thotë se është gati të nisë procedurat për marrjen e nënshtetësisë shqiptare duke qenë se “unë kam një grua nga ai vend (Jonida Dani e martuar në 2023). Kur të kryej dënimin, do të refuzoj shtetësinë italiane”.
Ish-sipërmarrësi i parukierisë u shpall fajtor për këto episode dhe Gjykata e Shkodrës e dënoi me katër vite burg.
Data e dorëzimit tek autoritetet shqiptare duhet të mbërrijë brenda datës 12 prill: “Do të më marrin në një aeroport italian dhe do të më dërgojnë në një burg në Shqipëri, ku një gjyqtar do të vendosë nëse do të më mbajë në paraburgim apo do të më japë arrest shtëpie në pritje të apelit”. Po, sepse në Shqipëri dënimi i tij me 4 vite burg nuk është ende përfundimtar.
Ende nuk është bërë e ditur data e transferimit, por mbërritja e tij në Shqipëri mund të bëhet brenda Pashkëve, sipas asaj që ka dalë nga qarqe pranë Ministrisë së Drejtësisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
