.png)
Nga Gazeta 'SI'- Inflacioni në Shqipëri ka kaluar pritshmëritë e autoriteteve ndërkombëtare dhe vendase, duke rënë në 2.6% gjatë shkurtit 2024.
Për herë të parë në dy vite inflacioni ra nën objektivin 3% të Bankës së Shqipërisë, që parashikohej të arrihej në gjysmën e dytë të vitit.
Gjithsesi çmimet kanë vijuar rritjen, por me ritme më të moderuara.
Sipas INSTAT, nga shkurti 2022 në atë 2023, çmimet e grupit argëtim dhe kulturë janë rritur me 4.9%, ndjekur nga mobiljet dhe pajisjet shtëpiake, 4.7%, hotele, kafene dhe restorante me 3.8% etj.
Ushqimet dhe pijet joalkoolike kanë patur një rënie në ritmin e rritjes dhe janë shtrenjtuar me 2.7% në raport vjetor. Produktet e bulmetit, përfshirë vezët u rritën me 4.7%, zarzavatet dhe patatet me 4.6%, mishi dhe peshku me 4.2%.
I vetmi grup kontribuues që ka pësuar ulje është transporti, ku përfshihen karburantet, me 1.6%.
Në raport mujor, rritja ka qenë më modeste.
Rënia e inflacionit poshtë objektivit do të thotë një hap pas për politikën monetare. Nëntorin e shkuar ishte lëvizja e fundit e BSH-së, kur rriti normën e interesit në 3.25%.
Edhe në BE, inflacioni mesatar për shkurtin ishte po 2.6%. Banka Qendrore Europiane sinjalizoi ulje të normës së interesit muajin e ardhshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
