Është inauguruar pika kufitare me Malin e Zi në Hanin e Hotit. Të pranishëm në ceremoni kanë qenë ministri i Brendshëm, Xhafaj dhe homologu i tij malazez si dhe ambasadorja Vlahutin.
Pika kufitare e Hanit të Hotit është transformuar rrënjësisht dhe sot qytetarët dhe bizneset përfitojnë shërbime shumë herë më të shpejta e cilësore krahasuar me disa vite më parë.
Në fjalën e tij, ministri Xhafaj tha se prioritet i qeverisë shqiptare është zhvillimi i turizmit. Gjithashtu, ai shprehu mirënjohje dhe falënderim për Bashkimin Europian, që kontribuoi në realizimin e këtij projekti.
“Financimi nga projektet e BE për këtë investim shkon rreth 2.5 mln euro. Shprehim falënderim për kontributin e dhënë nga BE për të kthyer këtë pikë të kalimit kufitar në një shërbim më cilësor. Qeveria shqiptare ka në prioritetet e saj zhvillimin e turizmit, ndaj po kujdeset që portat hyrëse për në vendin tonë të kenë standardet e duhura. Masat që kemi marrë në kuadër të sezonit turistik, synojnë edhe ofrimin e shërbimit cilësor në portat hyrëse. Objektet që inauguruam sot do të japin kontributin e tyre në lëvizjen e shpejtë të qytetarëve. Jemi të bindur se ky investim do të realizojë pritshmëritë, për të mundësuar menaxhimin e duhur të kufirit”, u shpreh ministri Xhafaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
