.png)
Gazeta Si – Igli Tare, drejtori sportiv i Lacios, kërkon të afrojë në skuadër një tjetër futbollist me origjinë shqiptare. Bëhet fjalë për Ardon Jasharin, për të cilin ka interes edhe Atalanta e Berat Gjimshitit.
Mesfushori i datëlindjes 2002 luan me Lucernën në Zvicër dhe konsiderohet si një nga talentet më brilante të kampionatit zviceran. Ai ka një kontratë deri në vitin 2026 me klubin e tij, që mund ta lëshojë për një shifër rreth 8 milionë eurove.
Do të ishte një nga ato lëvizjet tipike të Tares, i cili shpesh ka marrë lojtarë nga kampionate të dorës së dytë dhe më pas ua ka rritur vlerën atyre te Lacio. Mbetet të shihet, nëse përpjekjet e tij do të finalizohen me sukses edhe këtë herë.
Po ashtu, Igli Tare ka qenë gjithmonë i prirur për të afruar lojtarë shqiptarë në skuadrën e Lacios, ku mund të përmenden Tomas Strakosha, Lorik Cana, Valon Berisha, Riza Durmishi dhe Vedat Muriqi. Jashari mund të jetë goditja e radhës. Mesfushori luan për Zvicrën dhe emri i tij është lakuar edhe si një afrim i mundshëm i Selltikut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
