.png)
Ka mjaftuar përmendja e gruas (ministres së Arsimit, Besa Shahinit), që debati mes dy kandidatëve për deputetë në Kosovë, Haki Abazi dhe Dardan Molliqaj, të përfundojë në përplasje fizike.
Abazi, zyrtar i Lëvizjes Vetëvendosje dhe Molliqaj, ish drejtues i partisë se Albin Kurtit, por tashme i larguar në Partinë e Shpend Ahmetit, (bashkëshorti i ministres Shahini dhe përfaqësues nga koalicioni PSD-AAK), kanë pasur debate të ashpra gjatë emisionit Pressing në “T7”. Edhe pse ishin në transmetim të drejtpërdrejtë, ata kishin konfrontime të forta gjatë gjithë debatit televiziv duke fyer njëri-tjetrin.
Por përplasja fizike duket se erdhi kur Dardan Molliqaj i tha Abazit se do ta shihte në ëndërr pasi e ka përmendur gjatë gjihë kohës.
“Po them një batutë të fundit, me që Hakia më ka përmendur aq shpesh, them se edhe do më shohë sot”, tha Molliqaj.
Por përgjigja e zotit Abazi duket se ishte e papërmbajtur, duke përfshirë në debat edhe zonjën Shahini.
“E mira është që ti s’je i vetmi Dardan, ty nuk të shoh në ëndërr kurrë, ty as gruaja jote nuk të sheh në ëndërr”, i tha Abazi, duke i kërkuar zotit Molliqajt të mos e thërrasë Hakia, pasi është në gjininë femërore.
Por bashkëshorti i ministres Shahini duket se ia ktheu shkurt duke i thënë se “ dukej pak si femër”.
Ka mjaftuar ky debat që tensionet të arrinin kulmin, ndërkohë që Abazi dhe Molliqaj vazhdonin duke fyer njëri-tjetrin. Pas përfundimit të pjesës së parë të emisioni “Pressing”, Abazi dhe Molliqaj duket se vendosën ta zgjidhnin fizikisht “problemin” duke qëlluar njëri-tjetrin me grushte. Ndërhyrja e stafit të emisionit duket se nuk ka qënë e mjaftueshme për t’i ndarë të dyja palët, duke detyruar të pranishmit të telefonin policinë.
“Kam qenë duke dalë nga koridori i televizionit dhe Dardani me shoqëruesin e tij erdhën mbrapa dhe donin të më godisnin. Ishte një njëfarë situate e pakëndshme, më kapën edhe prej fyti”, deklaroi Abazi.
Por Molliqaj duket se ka mohuar gjithçka, edhe pse si ai ashtu edhe zoti Abazi janë marrë në pyetje nga policia e Kosovës.
“Asgjë nuk ndodhi jashtë studios, përveç një debati me pak tensione që ishte vazhdimësi e debatit publik. Unë nuk i kam problem debatet televizive dhe ndjehem shumë komod t’i mbroj bindjet e mia. Nuk fshihem asnjëherë. Çdo veprim timin politik jam në gjendje ta arsyetoj deri në fund. Nuk e kam problem asnjë akuzë e sulm për veprimet e mia politike”, ka deklaruar bashkëshorti i ministres Shahini pas incidentit.
Ndërkohë, në një reagim në faqen e saj në Facebook, Lëvozja Vetëvendosje e ka quajtur Molliqajn, bandit.
“Bandat mafioze që kanë kapur shtetin po frikësohen prej ndryshimit që po vjen, prej entuziazmit popullor dhe prej drejtësisë që do të vendoset nga Lëvizja VETËVENDOSJE! Ata po e shfaqin nervozizmin e tyre duke shpifur pa u ndalur dhe duke sulmuar fizikisht. Ata tashmë e kanë traditë sulmin fizik ndaj debatuesve në emisione televizivë. Publiku nuk e meriton këtë nivel të ulët diskutimi. Kosova nuk e meriton këtë nivel të ulët përfaqësimi. Tani po e kuptojmë se slogani i tyre propagandistik ‘guxim dhe dije’, nënkupton që guximin e paskan banditët dhe dijen injorantët. Presim nga policia të marrë masa ndaj tyre. I bëjmë thirrje KQZ-së të largojë nga lista këta persona që po ushtrojnë dhunë”, thuhet në deklaratën e VV-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
