.png)
Fundjavë pozitive për futbollistët e Kombëtares shqiptare. Në Itali, ku luajnë disa prej tyre, kapiteni Elseid Hysaj duket se po kthehet në kohët e tij më të mira. Në fitoren 2-1 të Napolit ndaj Juventusit kryesues, shkodrani ishte mes tre lojtarëve më të mirë për skuadrën e tij, bashkë me kapitenin Insinje dhe Zielinskin.
Hysaj është vlerësuar me notën 7, si asnjëherë këtë sezon. Për paraqitjen e mbrojtësit të djathtë, shtypi sportiv italian shkruan: “Një pjesë e parë e mirë e futbollistit shqiptar, i cili e limiton në maksimum Kristiano Ronaldon. Në pjesën e dytë bën akoma më mirë dhe në fund është një nga më të mirët për Napolin”. Me ardhjen e trajnerit Gazuto, Hysaj ka pasur më shumë hapësirë dhe nga java në javë po e rrit nivelin e tij, çka e bën edhe më të paqartë të ardhmen e mbrojëtsit, pasi Napoli mund ta heqë nga lista e atyre që janë në shitje.
Tomas Strakosha kishte një ndeshje të rëndësishme të dielën, derbin me Romën. Portieri kuqezi ka bërë një gafë në rastin e golit të Romës, duke gabuar në dalje, ndaj dhe është vleërsuar me notën 5. “Gabon rëndë në golin e Xhekos, pasi del keq dhe në kohë vonesë. Por më pas e merr veten dhe me dy-tre pritje vendimtare e ndihmon Lacion të marrë barazimin në derbi”, - shkruhet në vlerësimin për Strakoshën. Gafa e tij në fakt u eklipsua nga një gafë më e rëndë e portierit të Romës, Pau Lopez, i cili i fali golin e barazimit Lacios.
Edhe Marash Kumbulla ka qenë në lartësinë e zakonshme. Mbrojtësi i ri kuqezi është vlerësuar me notën 6.5 për paraqitjen në fitoren e thellë të Veronës ndaj Leçes. Një paraqitje e ngjashme me atë të Amir Rrahmanit, të cilët, sipas shtypit italian, ishin të vëmendshëm dhe nuk u lanë asnjë hapësirë e sulmuesve të Leçes. Titullar ka luajtur edhe mbrojtësi tjetër kuqezi, Berat Gjimshiti, i cili ka shijuar fitoren 0-7 të Atalantës në fushën e Torinos. Mesfushori Emanuele Ndoj luajti 20 minuta në humbjen 0-1 të Breshias ndaj Milanit. Berisha ishte pa fat këtë herë, teksa Spali i tij mund 1-3 në derbin me Bolonjën.
Në Gjermani, “derbin” mes Amir Abrashit dhe Klaus Gjasulës e ka fituar Paderborni me rezultatin 0-2. Gjasula luajti 75 minuta në këtëndeshje, kurse Abrashi vetëm pjesën e parë. Tani Paderborni shpreson te mbijetesa. Në fundjavë ka gjetur rrugën e rrjetës sulmuesi Armando Sadiku. Ai shënoi golin e dytë në barazimin 2-2 të Malagës ndaj Mirandes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
