.png)
Gazeta Si- Ushtria amerikane tha se rebelët e lëvizjes jemenase Houthi kanë sulmuar me raketa një anije tregtare në Gjirin e Adenit. Sipas Komandës Qendrore të SHBA-së, anija M/V MSC SKY II pësoi “dëme”.
Sipas raportimeve të para, në bordin e anijes nuk ka pasur të lënduar si pasojë e këtij sulmi. Anija, që është e regjistruar në Liberi dhe ishte nën pronësi zvicerane, nuk ka kërkuar ndihmë pas sulmit dhe ka vazhduar rrugëtimin, tha Komanda amerikane.
Përveç synimit të anijeve, rebelët Houths prenë tre kabllo nënujore në Detin e Kuq, duke ndërprerë rrjetet e telekomunikacionit dhe duke detyruar ofruesit të ridrejtojnë rreth një të katërtën e trafikut midis Azisë, Evropës dhe Lindjes së Mesme, duke përfshirë trafikun e internetit.
Një ditë më herët, rebelët e Houthi, që mbështeten nga Irani, thanë se kanë sulmuar një anije “me një numër raketash detare”.
Houthët kanë kryer sulme ndaj anijeve tregtare në Detin e Kuq që nga nëntori i vitit të kaluar, në mbështetje të palestinezëve pas nisjes së luftës në Gazë mes Izraelit dhe Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.
Ushtria amerikane tha se Huthët kanë lëshuar disa raketa nga Jemeni drejt jugut të Detit të Kuq. Megjithatë, raketat ranë në ujë dhe nuk dëmtuan asnjë anije tregtare apo anije të Marinës amerikane.
Ushtria amerikane tha se forcat e saj kanë kryer sulme “vetëmbrojtëse” kundër dy raketave që paraqitën “një kërcënim të menjëhershëm” ndaj një anijeje tregtare dhe anijeve të Marinës amerikane në rajon, u tha në deklaratë.
SHBA-ja dhe Britania kanë kryer sulme kundër caqeve të Huthëve në Jemen dhe e kanë kthyer këtë lëvizje jemenase në listën e grupeve terroriste.
Sulmet e Houthëve kanë penguar tregtinë globale, duke detyruar anijet që të ndryshojnë rrugët, duke përdorur rrugë më të gjata, gjë që ka rritur çmimet e transportit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
