.png)
Gazeta Si - Kreu i SPAK, Arben Kraja ka pohuar nga SHBA-të se institucioni që ai drejton, vepron në bazë të provave dhe jo të listave sa i takon hetimeve të aferave të zyrtarëve të lartë.
Nga opozita ka kritika ndaj SPAK se nuk po veprohet ndaj politikanëve të lartë. Nga ana tjetër kryeministri Rama ka përmendur faktin SPAK po godet vetëm majtas.
Në intervistë për Zërin e Amerikës, pasi u pyet nëse në SPAK ka trysni nga opinionet politike, Kraja u shpreh se prokurorët veprojnë sipas ligjit.
Ai theksoi se është e rëndësishme që prokurorët e SPAK të jenë të pavarur dhe objektivë në vendimmarrje. Sipas tij, është rënë dakord mes tyre si grup prokurorësh dhe hetuesish të BKH që të qëndrojnë sa më larg opinioneve që shprehen nga partitë politike në lidhje me punën që duhet të ndjekë SPAK.
“Ne veprojmë bazuar në ligje gjithmonë. Opinioni publik ka të drejtën e tij të shprehet. Partitë politike po ashtu. Secili shprehet sipas interesit të tij. Problemi është që duhet të jemi të ndërgjegjshëm që ne nuk veprojmë në bazë të një liste të caktuar, apo në bazë të një radhe të caktuar, por në bazë të provave, për ato dosje penale që ne kemi dhe pastaj kur arrihet që provohet fajësia e dikujt marrim masa për t’i çuar për gjykim. Kjo është puna jonë. Ajo që kemi rënë dakord si grup, si prokurorë dhe hetues të BKH-së, është që të rrimë sa më larg këtyre opinioneve që shprehen qoftë nga parti politike, në media të ndryshme në lidhje me punën se çfarë duhet të bëjë dhe nuk duhet të bëjë SPAK. Secili prej prokurorëve ka dosjet e tij përpara. Është i pavarur. Është i detyruar të mbledhë prova, të japë zgjidhje ligjore dhe e rëndësishme është të jetë i pavarur dhe objektiv në vendimmarrje”.
Kraja foli edhe për çështjet që po hetohen, ndër to, inceneratorët.
“Çështja e inceneratorëve është çështje shumë komplekse sepse janë përfshirë shumë institucione shqiptare që kanë qenë pjesë e këtij aktiviteti. Po kështu është një volum i madh pune për të sqaruar se çfarë ka ndodhur. Ne kemi tre hetime, pra tre çështje penale për secilin nga inceneratorët, pra Elbasanin, Fierin dhe Tiranën. Për dy të parët kemi arritur disa konkluzione paraprake, kemi bërë disa njoftime që ju i dini tashmë sepse janë bërë publike. Kemi ngritur përgjegjësi për disa persona, përfshirë edhe zyrtarë të lartë të shtetit shqiptar, por hetimet vazhdojnë. Edhe për inceneratorin e Tiranës do të vijojnë deri në fund për të sqaruar se çfarë ka ndodhur. Në qoftë se ka përgjegjësi penale, kush ka dhe do përgjigjet kush të ketë shkelur ligjin”, u shpreh Kraja.
Sa i përket hetimit të koncesioneve në shëndetësi, Kraja tha se “Po punohet intensivisht sidomos tani pasi është plotësuar numri i hetuesve të Byrosë Kombëtare të Hetimit me të gjitha këto dosje për të mbledhur provat e nevojshme dhe për të sqaruar se çfarë ka ndodhur dhe ka përgjegjësi njeri apo jo. Ai që ka do përgjigjet para ligjit, kushdo që të jetë”.
Kraja foli edhe për hetimin e grupeve kriminale. Sipas tij, grupet shqiptare kanë rritur aktivitetin jashtë vendit dhe paratë që i fitojnë i investojnë në vendin tonë. Prandaj për këtë arsye ai u shpreh se SPAK ka vendosur kontakte me institucionet e huaja në mënyrë që të godasin këto grupe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
