Ljuis Hemilton triumfon edhe në Çmimin e Madh të Katarit, përpara Maks Vershtapen, i cili mori një penalitet në minutat e fundit para garës dhe u nis nga rreshti i katërt. Në vend të tretë ka dalë Fernando Alonso.
Ishte një garë pa histori për vendin e parë dhe të dytë, më shumë është luftuar për vendet e tjera që të japin pikë (Perez i katërti dhe Okon i pesti). Ferrari nuk shkoi më shumë se vendi i shtatë dhe i tetë, me Karlos Sainz dhe Sharl Leklerk.
FINAL CLASSIFICATION: QATAR 🏁
— Formula 1 (@F1) November 21, 2021
Lewis wins again and closes the gap - and Fernando's back on the podium 👀
What an afternoon in Qatar!#QatarGP 🇶🇦 #F1 pic.twitter.com/yyQV1BYPmJ
Kur kanë mbetur edhe dy gara, Vershtapen kryeson me 8 pikë këtë Botëror shumë të luftuar, të mbushur me tension dhe me një sfidë që luhet pikë për pikë. Piloti holandez regjistroi në Katar xhiron më të shpejtë. Ai e nisi garën nga rreshti i katërt dhe jo nga i pari, pas penalitetit që mori gjatë kualifikueseve, ku nuk respektoi rregullat.
Vershtapen e mbylli xhiron e parë në vend të 4-t, pasi kaloi Gaslin dhe Alonson dhe më pas u vu në ndjekje të “Mbretit të Zi”. Hemiltonit i mjaftoi të ishte i përpiktë në “pit stop”-et e kundërshtarit për të marrë fitoren e dytë radhazi, pas asaj në Brazil dhe për ta çuar tashmë në 8 pikë diferencën: 351.5 pikë për Vershtapenin dhe 343.5 për të.
Pas dy pilotëve të parë, të paarritshëm nga të tjerët, doli Fernando Alonso. Spanjolli mungonte në pod prej 7 vitesh, saktësisht që në Çmimin e Madh të Hungarisë në vitin 2014, kur doli i dytë me Ferrarin, pas Daniel Riçardos.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.