Firma në kontratën e re me Mercedesin po vonon ende, edhe pse duket vetëm një formalitet, ndërsa Ljuis Hemilton, me anë të rrjeteve sociale, ka përshëndetur presidentin e ri të SHBA-ve, Xho Bajden. Hemilton është një nga ata personazhe që synon të jetë më shumë se thjesht një pilot i Formulës 1 dhe këtë e ka treguar shpesh gjatë 2020-ës.
Piloti anglez ka marrë vëmendjen jo vetëm me fitoret e garave dhe titullin kampion në F1, por edhe me përfshirjen e tij në lëvizjen "Black Lives Matter", duke ngritur zërin fort ndaj diskriminimit racor. Qëndrim ka mbajtur e gjitha bota e automobilizmit, por në ndonjë rast në forma shumë të buta për të mos e përzierë sportin me politikën. Gjithsesi, Ljuis Hemilton ka vazhduar me qëndrimin e tij, si një lider i vërtetë.
Betimi i presidentit Bajden në Shtëpinë e Bardhë dhe zëvendëspresidentit Kamala Harris, është ndjekur me shumë entuziazëm nga kampioni i botës. "Një ditë historike për Amerikën, që sjell shpresë për të ardhmen, një shembull diversiteti i lidershipit, që shpresoj të reflektohet në qeveri. Urime Xho Bajden dhe Kamala Harris, paçi fat!" – shkruan Hemilton në profilin e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.