.png)
Nga sot, Ljuis Hemilton është piloti me më shumë fitore bashkë me Mikael Shumakerin në Formula 1, nga 91 secili. Kampioni në fuqi i botës ia doli të fitojë “Çmimin e Madh” të Eifelit, duke mundur Maks Vershtapenin e Red Bull-it dhe Daniel Riçardon me Reno. Vetëm një vend i shtatë për Ferrarin me francezin Leklerk.
Ljuis Hemilton ka kapur Everestin e sportit, atë që ëndërronte që fëmijë. Teksa ai zbriste nga makina, ka parë djalin e Mikael Shumakerit me kaskën e të atit, që ishte dhuratë për anglezin. Mik Shumaker, i cili shumë shpejt do të debutojë në Formula 1, i ka shtrënguar dorën anglezit, duke i thënë: “Komplimente, e ke merituar”. Hemilton është dukur shumë i emocionuar. “Nuk di çfarë të them, është një nder i madh”, - ishte përgjigja falënderuese e tij.
Dihej që ky rekord nuk do të vononte dhe ja ku erdhi në Gjermani, në vendin e Mikael Shumakerit. Ljuis Hemilton ka edhe 6 gara për të shkuar më tej, por dita e madhe është sot. Gara ishte një tjetër provë force për Mercedesin. Valteri Botas provoi të fitonte, pasi u nis i pari, por problemet teknik të makinës së tij i hapën rrugën fitores së Hemiltonit, i cili në xhiron e 13-të mori kryesimin e garës dhe nuk e lëshoi më.
Red Bull-i i Maks Vershtapen e ndoqi anglezin derisa mundi. Pas tyre e mbylli garën Daniel Riçardo, i cili kërkoi me çdo kusht ta mbyllte aventurën me Reno me një pod. Leklerk zuri vendin e shtatë, kurse Sebastian Fetel të 11-in.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
