Edi Reja që prej ditës së mërkurë ka veshur zyrtarisht tutat e trajnerit të kombëtares shqiptare, duke nisur punën fillimisht me një grup lojtarësh që kanë mbaruar aktivitetet me klubet e tyre dhe po ndiqen me imtësi. Të gjithë u habitën, kur Reja e nisi grumbullimin e ekipit kombëtar shumë herët dhe në listë ishin shumë futbollistë të rinj që ishin marrë në provë, për t’i parë nga afër nëse janë të vlefshëm për fanellën kuqezi. Por këto nuk janë të vetmet risi që Edi Reja ka sjellë në kombëtaren shqiptare në këto dy ditë të para të punës së tij.
Atmosfera më e çlirët dhe shumë herë më pozitive nga ajo që ishte me Panuçin, është kryefjala e ditës në kombëtaren shqiptare. Me një jetë të tërë si trajner, Reja duket se e kuptoi që në fillim se çfarë duhej për ta nisur mbarë punën te kombëtarja shqiptare. Të gjithë lojtarët, të rinjtë dhe “veteranët” në këto dy ditë të para flasin mirë për të, duke filluar që nga ana teknike dhe deri tek ajo ndërpersonale. Grezda e pohoi këtë gjë në një intervistë për supersport, duke çmuar shumë eksperiencën e madhe të Rejas. Por edhe futbollistët e tjerë, përmes rrjeteve sociale e përcjellin atë frymë pozitive që është duke u ngjizur në kombëtare gjatë këtyre dy ditëve të para me 73-vjeçarin trajner.
Sa i përket emrave të rinj, Edi Reja edhe këtë të enjte befasoi, teksa thirri në kombëtare një tjetër talent të kampionatit shqiptar, si Jurgen Çelhaka. 20-vjeçari i Tiranës, i është bashkuar “zborit” të përfaqësueses në Durrës dhe po ndiqet nga afër nga trajneri dhe ndihmësit e tij. Por në fokus të veçantë trajneri i ri kombëtares duke se ka një nga mesfushorët më të spikatur të kampionatit shqiptar, si Bruno Telushi. Futbollisti i Partizanit ishte një nga më të mirët në këtë sezon që po mbyllet dhe ftesa me kombëtare ishte mëse e merituar. Por Reja e pëlqen shumë vlonjatin dhe ka plane të tjera edhe më të mëdha për të. Me shumë gjasa nëse çdo gjë shkon mirë, Telushi do të jetë pjesë e grupit që do të mblidhet në Frankfurt për dy ndeshjet e radhës eliminatore të kampionatit europian.
Një tjetër risi që trajneri i ri italian ka tentuar që ta impelementojë që në ditët e para kishte të bënte edhe me skemën. Ashtu si në të gjitha ekipet ku ka luajtur, Edi Reja pritet ta rreshtojë kombëtaren shqiptare me formacionin 3-5-2. Pikërisht për këtë arsye ai ka filluar herët punën që të gjejë lojtarë në formë, por edhe që përshtaten me këtë skemë të re që ai pritet të provojë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.