.png)
Nga dopieta e Ferrarit, te dopieta e Mercedesit. Në Rusi kanë triumfuar Ljuis Hamilton dhe Valteri Botas, të cilët e kanë merituar. Parashikimi ishte për një tjetër sukses të Ferrarit, por strategjia e Mercedesit me goma të mesme u konkretizua në mënyrë perfekte. Kjo edhe falë një “Virtual Safety Car”, që hyri në pistë për të hequr një makinë të dëmtuar. Leklerk, i cili kishte ndërruar gomat dhe ishte në vend të dytë, pas Fetelit, por përpara dy makinave Mercedes, në fund u gjend pas “shigjetave të argjendta”. Bastin për ta nisur me goma të mesme e ka paguar vetë Ferrari.
Një nisje mjaft e mirë e Leklerk, i cili shfrytëzoi momentin, duke kaluar Mercedesin e Hamiltonit dhe më pas edhe shokun e skuadrës te Ferrari. Grosjean në kthesën e 4-t u përplas me barrierat pas një prekjeje me një Alfa. Raikonen u ndëshkua për nisje para kohe. Në skuderinë Ferrari pati tension, kur “Safety car” u fut në pistë për të hequr makinën e Grosjean. Nga komunikimi mes pilotëve dhe drejtuesve të skuderisë u kuptua se nisja e Fetelit ishte studiuar për të “djegur” Hamiltonin. Një manovër e realizuar e ferraristëve, por Leklerk kërkoi që të rimerrte pozicionin e tij, ndërsa Fetel vazhdoi të qëndronte përpara. Më pas dialogu u ashpërsua disi, pasi francezit Leklerk ia kërkua të qëndronte pas Fetelit dhe ta ndërronte pozicionin me të më pas.
Në xhiron e 21-të, Norris inauguroi “pit stop”-in, Leklerk në xhiron e 23-të vuri gomat e mesme dhe u kthye në pistë në vend të 4-t, pas Fetelit dhe dy makinave Mercedes. Fetel ndaloi në xhiron e 25-të dhe u rikthye në pistë pas Leklerk. Surpriza erdhi më pas, teksa Fetel e parkoi Ferrarin e tij në kthesën 15 për një problem dhe me futjen e “Virtual Safety Car”, makinat Mercedes rikuperuan kohën. Në xhiron e 28-të sërish “Safety Car” në pistë pasi doli jashtë Rosell. Ferrari vendosi që Leklerk të hynte në bokse kur ishte i dyti. Francezi i sulmoi makinat e Mercedes, por plani i Ferrarit nuk shkoi si duhet. Leklerk bëri gjithçka për të kaluar Botas, por mbeti pas, ndërsa Hamilton e mbylli i pari. Konfirmohet kështu në Rusi tradita e Mercedesit, gjithmonë para të tjerëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
