.png)
UEFA ka vendosur ta përjashtojë Mançester Sitin për dy sezonet e ardhshme të Champions League dhe nga të gjitha kupat europiane. Një dënim i rëndë për kampionët në fuqi të Anglisë, për shkak të shkeljes së rregullave të “fair-play”-it financiar. “Qytetarët” janë gjobitur edhe me 30 milionë euro. Tani drejtuesit e Mançester Sitit pritet t’i drejtohen tashmë KAS-it të Lozanës, pasi është shumë i zhgënjyer nga ky vendim.
Në njoftimin zyrtar të UEFA-s shkruhet: “Trupi gjykues, pasi analizoi me kujdes të gjitha provat, ka arritur në konkluzionin se Mançester Siti ka bërë shkelje të rënda të rregullores në lidhje me licencën e “fair-play”-it financiar, duke mbivlerësuar në bilancet e veta të ardhurat nga sponsorizimi. Ka bërë shkelje edhe në informacionet e bilancit të prezantuar në UEFA për periudhën 2012-2016. Klubi nuk ka bashkëpunuar në hetimin e kësaj çështjeje”.
Gjatë vitit 2018 janë publikuar dokumente dhe “email”-e komprometuese nga gjermania “Der Spiegel”. Veçanërisht janë publikuar disa “email”-e që duhej të mbeteshin private, që bënin të qartë se klubi anglez kishte fryrë shumën e sponsorizimeve për të rregulluar bilancin e “fair-play”-it financiar. Zbulohej nga këto dokumente se nga 65 milionë stërlina, 57 ishin kaluar në llogaritë e klubit direkt nga pronarët, ndërkohë që rezultonin se ishin të ardhura nga sponsorizimet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
