.png)
Gazeta Si – Pas një pjese të parë të vuajtur, Juventusi gjeti golin e fitores me Gatin në minutën e 73-të. Vendimtare ishin edhe pritjet e Perin në fundin e ndeshjes, ndërsa kualifikimi vendoset në Lisbonë pas 7 ditësh.
Juventusi mundi 1-0 Sportingun e Lisbonës në Torino, në raundin e parë të çerekfinaleve të Ligës së Europës. Djemtë e Alegrit hasën jo pak vështirësi në pjesën e parë, rrezikuan të pësonin gol disa herë, u rritën më pas në pjesën e dytë. Për të zgjidhur një ndeshje të komplikuar mendoi mbrojtësi Federiko Gati, i cili shënoi 2 hapa larg portës golin e parë bardhezi, duke përfituar edhe nga gabimi i portierit Adan, pas gjuajtje me kokë të Vlahoviç.
Në fund u ngjit në katedër Perin, me një ndërhyrje të dyfishtë në kohën shtesë, duke e shpëtuar Juventusin nga goli i barazimit. Italianët shkojnë në Portugali me avantazhin e fitores në ndeshjen e parë.
Në fundin e pjesës së parë, portieri Shezni nuk u ndje mirë. Ai vendosi dorën në gjoks dhe kërkoi ndërrim menjëherë. Dukej mjaft i frikësuar, por shkoi me këmbët e veta në dhomën e zhveshjes. Elektrokardiograma doli mirë për portierin polak, që do të kryejë edhe kontrolle të tjera të detajuara, por frika ka kaluar tashmë.
Në ndeshjet e tjera, Roma humbi 1-0 në fushën e Fejnordit. Përveç ndeshjes, Mourinjo humbi edhe dy dy sulmuesit Dibala dhe Abraham për shkak dëmtimi.
Mançester Junajtid po fitonte 2-0 deri afër fundit të ndeshjes me Seviljen, por pastaj bëri ‘vetëvrasje’. “Djajtë e kuq’ u barazuan në 2-2 nga spanjollët me Navas dhe En Nesyri, i ndihmuar edhe nga Meguajër, kështu që duhet të nisin gjithçka nga e para në ndeshjen e kthimit. Barazim edhe mes Bajer Leverkusen dhe Union SG.
Liga e Europës
Sot
Fejnord-Roma 1-0
Bajer Leverkusen-Union SG 1-1
Juventus-Sporting 1-0
Mançester J.-Sevilja 2-2
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
