.png)
18 nga 42 viktimat e tragjedisë së Xhenovës u përcollën për në banesën e fundit, në funeralin shtetëror që u mbajt nën praninë e Presidentit të Republikës, Sergio Mattarella dhe gjithë kabinetit qeveritar. Ndërkohë që sot është nxjerrë edhe viktima e fundit nga rrënojat. Bëhet fjalë për një punonjës i firmës së pastrimit të Bashkisë së Xhenovas, i cili pak para rënies, kishte qenë poshtë Urës Morandi për të marrë turnin.
Mes viktimave të nderuara sot ndodheshin edhe trupat e dy të rinjve shqiptarë Marjus Djerri 22 vjeç dhe Admir Bokrina 31 vjeç.
Arkivolet e dy të rinjve shqiptarë ishin mbuluar me flamurin kuq e zi. Ata ishin duke udhëtuar në urën e tragjedisë, teksa ishin duke shkuar për në punë. Marjusi, nga Shijaku, kishte pak ditë që ishte kthyer nga pushimet nga Shqipëria. Ndërsa trupi i Admirit u gjet në sytë e prindërve të tij dhe bashkëshortes.
Në lutjen dedikuar dy të rinjve shqiptarë, përfaqësuesi i bashkësisë islame të Xhenovas, imami Salah Hussein u shpreh se "Xhenova, e cila në arabisht do të thotë "e bukura", do të dijë të ringrihet".
Në ceremoni mungonin ministrat shqiptarë, si ai i Diasporës, Pandeli Majko ashtu edhe ministri i Jashtëm, Ditmir Bushati. Shumica prej familjeve italiane e refuzuan ceremoninë shtetërore dhe i përcollën privatisht të afërmit e tyre.
Ndërkohë, dita e sotme është shpallur ditë zie kombëtare, ku shteti italian ka ulur flamujt në gjysmë shtizë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
