Gazeta Si - Disa persona janë shoqëruar si të dyshuar në lidhje me shpërthimin me tritol të ndodhur mbrëmjen e të hënës në banesën e Ilir Koçiljas në Durrës, i cili pak ditë më parë vrau me thikë Halil Kokën për vendparkimin para banesës.
Sipas burimeve, policia ka ndërtuar identikitin e autorit të dyshuar bazuar në kamerat e sigurisë së bizneseve përreth.
Në fasadën e jashtme të shtëpisë së 35-vjeçarit Ilir Koçilja, ishte shkruar me bojë të zezë në murin pranë banesës: “Endacaku Vrasës”!
![](https://gazetasi.al/wp-content/uploads/2024/02/enda-1.jpg)
![](https://gazetasi.al/wp-content/uploads/2024/02/enda-2.jpg)
![](https://gazetasi.al/wp-content/uploads/2024/02/enda-3.jpg)
![](https://gazetasi.al/wp-content/uploads/2024/02/enda-4.jpg)
![](https://gazetasi.al/wp-content/uploads/2024/02/enda-6.jpg)
![](https://gazetasi.al/wp-content/uploads/2024/02/enda-7.jpg)
Policia dyshon se menjëherë më pas i është vënë tritol banesës, ku aktualisht nuk jeton njeri. Përcjellja e një mesazhi nga persona të paidentifikuar, që policia e Durrësit paraprakisht hetimet i lidh me ngjarjen e ndodhur më 14 shkurt, ku Ilir Koçilja vrau me thikë fqinjin e tij Halil Koka, është një nga pistat në të cilën po hetohet.
Për të bërë të mundur identifikimin e autorit, policia ka siguruar pamjet e kamerave të sigurisë ku shihet një person me kapele e kapuç, që lëvizte në vendin e ngjarjes pak minuta para shpërthimit.
Afro 500 gramë me fitil zjarrpërcjellës u vendos në pjesën e jashtme të dritares së banesës së shtetasit Ilir Koçija, i cili ndodhet në paraburgim për vrasje.
Si pasojë e shpërthimit u shkaktuan dëme të konsiderueshme, jo vetëm në shtëpinë e Koçiljas, në të cilën nuk banonte askush, por edhe tek makinat e parkuara pranë vendit të shpërthimit si dhe tek apartamentet ngjitur.
Më 14 shkurt, Koçilja, i cili dyshohet se vuan edhe nga probleme të shëndetit mendor vrau me thikë fqinjin e tij Halil Koka për shkak të një vendi parkimi.
Në 17 shkurt, Gjykata e Durrësit vendosi “arrest me burg” për Ilir Koçiljen, i cili në gjykatë është shfaqur i penduar, por në deklarimin e tij, ka qenë i paqëndrueshëm mendërisht.
Fillimisht ka deklaruar se ka humbur disa tenderë përballë mafies dhe më pas shpjegoi se si kishte ndodhur ngjarja. Ai tha se kanë qenë 3 vetë që po e ndiqnin për ta rrahur, midis tyre edhe viktima.
Gjyqtarja Besjana Garxenaj kërkoi që të bëhet edhe ekpertim i gjendjes psikologjike dhe mendore. Autori ka qenë i dënuar në vitin 2018 për përndjekjen e një shtetaseje me 4 muaj e 20 ditë burg.
Ai jeton i vetëm në Durrës, pasi familjarët e tij janë në emigracion. Ngjarja e rëndë ndodhi pas një sherri mes dy fqinjëve për parkimin e makinës së viktimës në hyrjen para pallatit.
Konflikti e kishte zanafillën disa ditë para vrasjes, që sipas 35-vjeçarit Koçilja i kërkonte të mos e parkonte makinën aty.
Koçilja tregoi se i kishte gërvishtur mjetin Halil Kokës, pasi ky i fundit vazhdonte ta parkonte para pallatit. E sipas tij, ditën e ngjarjes, Halil Koka e kërcënoi. Ai u kap pas disa orësh nga policia, teksa 47-vjeçari kishte ndërruar jetë në spital.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.