.png)
Zhvillohet sot pasdite, në distancën e 100 kilometrave, gara Sprint, që u jep pikë vetëm tre pilotëve të parë. Klasifikimi në këtë garë përcakton edhe pozicionin e makinave në nisjen e Çmimit të Madh të Silverston, që zhvillohet të dielën.
Gara e 10-të sezonale që zhvillohet në Britaninë e Madhe është e destinuar të hyjë në arkivat e Formulës 1 para se makinat të zbresin në pistë. Arsyeja? Cirkuiti i Silverston do të presë të parën garë Sprint, ose “Sprint Qualifying” të F.1. Për çfarë bëhet fjalë? Si funksionon, sa pikë marrin pilotët? Le t’i shohim me detaje.
E krijuar për të ndryshuar disi fundjavën tradicionale të Formulës 1 dhe për të përfshirë publikun më të ri, gara Sprint është aprovuar nga komisioni i FIA-s më 26 prill 2021. Bëhet fjalë për një format të ri gare, një garë të shkurtër 25-30 minuta, në program të shtunën, me rezultatin final që përcakton edhe renditjen e makinave për startin tradicional të garës të së dielës.
Për herë të parë gara Sprint zhvillohet në pistën e Silverston dhe i pari sot do të niset Ljuis Hemilton, i cili regjistroi kohën më të mirë në “Pole Position”. Më pas eksperimenti do të vazhdojë në Monca më 12 shtator dhe me shumë mundësi në Interlagos më 7 nëntor, nëse kjo garë do të bëhet.
Për Çmimin e Madh të Britanisë 2021, të premten skuadrat kanë bërë provat e lira dhe një turn normal kualifikuesesh klasike Q1, Q2 dhe Q3 me goma të buta në dispozicion. Rezultati i këtyre kualifikueseve ka përcaktuar edhe renditjen e makinave në momentin e nisjes së garës Sprint që zhvillohet sot, me Hemiltonin të parin.
Për sot në mesditë janë parashikuar FP2 (60 minuta) me zgjedhje të lirë nga skuadrat të gomave. Pasdite pastaj zhvillohet gara Sprint me distancën e 100 kilometrave. Gjatësia është fikse për çdo garë në vazhdim, ndërsa Çmimi i Madh tradicional i së dielës do të ketë distancën e 300 kilometrave. Gara Sprint nuk ka asnjë pit-stop. Është një model gare pa strategji dhe mendohet të jetë më nxitëse për pilotët. Makinat do të qëndrojnë në pistë pa ndërruar gomat dhe pa u furnizuar me benzinë.
Në Silverston, ku cirkuiti është 5.891 km i gjatë, gara Sprint parashikon 17 xhiro në total. Klasifikimi pas kësaj gare vendos edhe pozicionin e makinave në startin e garës që zhvillohet të dielën. Pra, ai që mbërrin i pari në finishin e garës Sprint, niset i pari të dielën. Gara Sprint nuk do të ketë ceremoni podi, për të mos hequr emocionet e Çmimit të Madh.
Duke marrë në konsideratë gjatësinë shumë më të vogël se gara tradicionale e së dielës, gara Sprint e së shtunës u jep pikë vetëm 3 pilotëve të parë, respektivisht 3 pikë të parit, 2 të dytit dhe 1 të tretit. Nuk ka pikë për xhiron më të shpejtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
