.png)
Gazeta Si – Gjykata e Posaçme ka shtyrë për më 20 maj seancën ndaj ish-ministrit të Shëndetësisë, Ilir Beqaj, i cili kërkon zëvendësimin e masës së sigurisë “arrest në burg” me një masë më të lehtë, i akuzuar për dosjen “SASPAC” me abuzimin e fondeve të BE.
Vendimi për shtyrjen u mor nga gjyqtarja Elsa Ulliri, pas kërkesës së prokurores Elida Kaçkini, e cila deklaroi se i nevojitet kohë për t’u përgatitur lidhur me prapësimet ndaj kërkesës së mbrojtjes. Seanca e radhës është caktuar më 20 maj, në orën 09:30.
Përmes avokatëve të tij, Beqaj ka kërkuar që masa e sigurisë të ndryshohet në “arrest shtëpie”, “detyrim paraqitje” ose në alternativë ka ofruar garanci pasurore në vlerën e 2 milionë lekëve, rreth 20 mijë euro.
Në argumentet e paraqitura në gjykatë, avokatët e Beqajt kanë përdorur edhe vendimin e marrë nga Gjykata e Lartë për masën e paraburgimit.
Sipas këtij vendimi, masa “arrest me burg” duhet të vendoset vetëm pasi të jenë shqyrtuar realisht alternativat e tjera më të lehta të sigurisë, ndërsa prokuroria duhet të argumentojë konkretisht nevojën për kufizimin ekstrem të lirisë.
Ilir Beqaj ndodhet në paraburgim që prej 4 korrikut 2024, kur u arrestua në kuadër të hetimeve për dosjen SASPAK, lidhur me dyshimet për abuzim me fondet e Bashkimit Evropian.
Ish-ministri, është i pandehur edhe për dosjen e koncesionit të “Sterilizimit”, ndërsa më 18 mars iu komunikua edhe akuza shpërdorim detyre e kryer në bashkëpunim. Ndaj Beqajt rëndojnë akuzat “Shpërdorim detyre”, e kryer në bashkëpunim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje