.png)
Gazeta Si - Finalja e Tiranës është shumë e rëndësishme për Romën dhe gjithë Italinë. Roma mund të mbyllë me një trofe europian këtë sezon të vështirë, trofe që i mungon prej shumë vitesh. Por mund t’i bëjë një nder të madh Italisë, t’i japë një vend tjetër në Europë.
Numri i skuadrave italiane në Kupat e Europës 2022-2023 varet nga Roma dhe finalja e Tiranës. Vendet në dispozicion aktualisht janë 7, por mund të bëhen 8, nëse Roma fiton në “Air Albania” dhe zë vendin e 8-të në kampionat.
Në Ligën e Kampionëve shkojnë 4 skuadrat e para të Serisë A, Milani, Interi, Napoli dhe Juventusi. Rregullorja i rezervon Italisë 2 vende në Ligën e Europës, skuadrën e 5-të në kampionat dhe fituesin e Kupës së Italisë.
Por, duke qenë se dy finalistët, Interi dhe Juventusi, janë në Ligën e Kampionëve, hapet një vend në Ligën e Europës edhe për vendin e 6-të të kampionatit. Vendi i 7-të shkon në Ligën e Konferencës dhe i 8-i mbetet në shtëpi.
Në teori, sepse këtu hyn në lojë Roma. Nëse skuadra e Mourinjos fiton Ligën e Konferencës, fiton të drejtën të luajë sezonin e ardhshëm në Ligën e Europës.
Nëse Roma e mbyll kampionatin në vend të 5-të apo të 6-të, Italia do ketë 2 skuadra në Ligën e Europës dhe të 7-ën në Ligën e Konferencës.
Nëse verdhekuqtë mundin Fejnordin në Tiranë dhe zënë vendin e 7-të në kampionat, Italia do ketë 3 skuadra në Ligën e Europës (5, 6 dhe Roma) dhe asnjë në Ligën e Konferencës.
Por, nëse Roma fiton kupën dhe zë vendin e 8-të në kampionat, Italia fiton një vend më shumë: 4 në Ligën e Kampionëve, 5, 6 dhe Romën në Ligën e Europës dhe vendin e 7-të në Ligën e Konferencës. Pra, 8 skuadra në total.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
