Industria fason me mbi 500 ndërmarrje dhe 100 mijë punonjës ndihet e rrezikuar financiar.
Florian Zekja, Kryetar i Dhomës Kombëtare të Prodhuesëve të Veshjeve dhe Këpucëve i tha gazetës “Si” se qeveria ka vonuar rimbursimin e TVSH-së së duke akumuluar borxh që prej 2017-ës. Për të, ky fakt është i rëndësishëm pasi sëbashku me rënien drastike të monedhës euro, rritjen e pagës minimale me 2000 lekë, industria e fasonit po mendon të shkurtoj punëtorët.
Ministri i Ekonomisë dhe Financave Arben Ahmetaj i është përgjigjur ditën e premte shqetësimit të fasonëve duke sqaruar se kompanive iu janë rimbursuar 15,1 mld rekord si shifër. "I gjithë stoku që i referohet kompanive të vogla është operativ 1,8 mld. Që do të thotë që shqetësimi i referuar mund të jetë diku diku, por nuk është sistemik.”
Sporadik për qeverinë, por jo për fasonët dhe agrobiznesin, për të cilët bllokimi i rimbursimit të TVSH-së ka sjellë bllokim të likuiditeve të këtyre kompanive duke krijuar ngërç sidomos në marrëdhëniet me nënkontraktorët.
Një industri që xhiron në vit gati 700 mln euro, mosrimbursimi i TVSH-së për një kohë të gjatë dhe zhvlerësimi i euros mbi 9 % sipas industrisë fasone, ka bërë që 500 sipërmarrës të Dhomës Kombëtare të Prodhuesve të Veshjeve dhe Këpucëve të mos arkëtojnë rreth 70 % të të ardhurave gjatë vitit 2018-të.
Sipas tyre fitimi mesatar i ndërmarrjeve të prodhimit fason është rreth 15 %, që do të thotë rënie e të ardhurave në masën 2/3.
Industria Fason i kërkon Qeverisë të gjejë mekanizmat për t'i ardhur në ndihmë ndërmarrjeve që të kalojnë gjendjen në të cilën ndodhen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.