.png)
Gazeta Si – Erdhi momenti që Europa të shpallë kampionët e rinj në futboll, ata që do të zbresin nga froni Real Madridin. Mbrëmjen e sotme (ora 21:00) në Stamboll luhet finalja e Ligës së Kampionëve mes Mançester Sitit dhe Interit. Një mbrëmje e madhe në ‘Ataturk’, me anglezët favoritë për të ngritur për herë të parë në historinë e tyre trofeun më të rëndësishëm për klube.
Mançester Siti i Guardiolës është vërtet një superfuqi e futbollit të sotëm dhe me të drejtë në letër kuotohet si favorit përballë një Interi, që kurrësesi nuk mund të nënvlerësohet. Në futboll ndodh gjithçka, jo gjithmonë fiton më i miri, kështu që duhet pritur shfaqja e sotme në Turqi.
Siti ka në përbërje lojtarët më të mirë në qarkullim, peshorja anon nga ‘qytetarët’, të udhëhequr nga Halandi i rekordeve dhe me specialistë në formacion, si De Bryjne, Bernardo Silva, Gyndogan e me radhë. Guardiola do të hedhë në fushë të njëjtin 11-sh, që eliminoi Realin e Madridit në gjysmëfinale.
Interi vjen po ashtu në një formë të mirë. Djemve të Inzagit u duhet të sforcohen në maksimum për të neutralizuar kundërshtarin. Italianët bazohen të mbrojtja solide dhe nisjet e shpejta në kundërsulm. Trajneri Inzagi i ka të gjithë të gatshëm, por titullar pritet të luajë Brozoviç para Mkhitarian. Në sulm veteran Xheko mbetet favorit ndaj Lukakut.
Kristjan Asllani, mesfushori i Kombëtares shqiptare, ëndërron të festojë me trofeun me veshë të mëdhenj mbrëmjen e sotme. Ai do të jetë në stol, ndoshta mund të ketë fatin të zbresë ndonjë minutë në këtë finale historike.
Finalja e Ligës së Kampionëve gjykohet nga arbitri polak, Szimon Marcianiak.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
