.png)
Gazeta Si – Në Budapest luhet sot në mbrëmje (21:00) finalja e Ligës së Europës mes Romës dhe Seviljes. Roma kërkon trofeun e dytë në dy vjet, trajneri portugez dhe skuadra spanjolle nuk humbasin kurrë.
Mbrëmja e specialistëve, që do të thotë se sido që të shkojë në Budapest, do të prishet një rekord. Sevilja dhe Mourinjo janë të pathyeshëm në finale, nuk kanë humbur kurrë në 6 të luajtura deri tani. Sevilja i ka bërë koleksion tashmë trofetë e Ligës së Europës, në anën tjetër Mourinjo, që kur shkon deri në fund dhe e ka bërë shpesh, gjithmonë ngre kupën…
Mourinjo nuk ka dashur të thotë asgjë për të ardhmen, por ka mundësi që sot ai të luajë ndeshjen e parafundit me Romën. Si ai me Romën nuk ka bërë askush. Fitorja në Ligën e Konferencës një vit më parë, tani finalja e Ligës së Europës. Nëse fiton, hyn në histori e klubit italian përgjithmonë.
Është e qartë se shumë gjëra kalojnë nga këmbët e Dibalës në finalen e sotme. Argjentinasi është stërvitur me ekipin, por për trajnerin Mourinjo ai do ta nisë nga stoli. Në mbrojtje do të jetë treshja Mançini-Smolling-Ibanjez, Matiç dhe Kristante në qendër të mesfushës, Çelik dhe Spinacola në krahë, ndërsa në sulm Pelegrini dhe El Sharaui do të mbështesin Abraham.
Në anën tjetër janë En-Nesyri, Torres, Okampo, Suso dhe Lamela janë ata që mund t’i bëjnë keq Romës. Lojën me shumë mundësi do ta bëjë Sevilja, sepse është në natyrën e saj, Roma do të presë dhe do të kundërsulmojë. Si gjithmonë, në finale diferencën do ta bëjë edhe mendja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
