.png)
Nga Gazeta ‘Si’- Elon Musk është bërë personi i parë në botë që arrin statusin e trilionerit në dollarë, pas ofertës publike rekord të aksioneve të SpaceX, raporton Reuters.
SpaceX ka vendosur çmimin e aksioneve në 135 dollarë për aksion, duke mbledhur rreth 75 miliardë dollarë nga tregu. Më shumë se 555 milionë aksione janë ofruar për investitorët, duke e çuar vlerën e kompanisë në rreth 1.77 trilionë dollarë.
Nëse këto shifra konfirmohen nga tregjet, SpaceX do të renditej menjëherë mes kompanive më të vlefshme në botë dhe do të bëhej kompania e shtatë më e madhe e listuar në Shtetet e Bashkuara.
Analistët e tregut thonë se suksesi i ofertës është nxitur nga interesi i lartë i investitorëve individualë, të cilëve Musk u ka rezervuar rreth 30 për qind të aksioneve të ofruara, një praktikë e pazakontë për ofertat e mëdha publike.
“Testi i vërtetë do të jetë mënyra se si tregu do ta përthithë këtë IPO gjatë javëve të ardhshme, jo vetëm gjatë ditës së parë”, tha Adam Sarhan, drejtues i kompanisë së investimeve 50 Park Investments.
Pas ofertës, Musk pritet të ruajë kontroll pothuajse të plotë mbi kompaninë, duke mbajtur rreth 82 për qind të të drejtave të votës.
Pjesa më e madhe e të ardhurave të SpaceX aktualisht vjen nga Starlink, rrjeti satelitor i internetit që operon në më shumë se 160 vende dhe përdoret nga individë, kompani, qeveri dhe organizata ushtarake.
Në të njëjtën kohë, Musk po zgjeron investimet edhe në inteligjencën artificiale përmes kompanisë xAI, duke synuar kombinimin e teknologjive hapësinore me fuqinë kompjuterike të gjeneratës së ardhshme.
Megjithatë, jo të gjithë ekspertët ndajnë të njëjtin entuziazëm. Disa paralajmërojnë se perspektiva financiare e kompanisë mbetet e lidhur ngushtë me kontratat qeveritare dhe me pritshmëritë afatgjata për industrinë hapësinore.
“Njerëzit që blejnë këto aksione po investojnë te e ardhmja dhe te ideja e zgjerimit të njerëzimit përtej Tokës, më shumë sesa te një kompani tradicionale”, tha Kim Forrest, drejtuese e investimeve në Bokeh Capital Partners.
Nëse aksionet e SpaceX do të shënojnë rritje të fortë që në ditën e parë të tregtimit, kjo do të konsiderohej një nga debutimet më të suksesshme në historinë e bursës amerikane.
Sa i përket pasurisë së Musk, ekspertët kujtojnë se vlera e saj nuk përfaqëson para të gatshme, por lidhet me aksionet që ai zotëron në kompanitë e tij, vlera e të cilave mund të ndryshojë vazhdimisht sipas lëvizjeve të tregut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje