Venecia: E kemi një mendim për Metën, vendimi më 11 tetor

Ekspertët e komisionit të Venecias mbyllën takimet dy ditore në Tiranë duke i dhënë fund edhe misionit faktmbledhës për çështjen që ato do të shqyrtojnë nëse presidenti Ilir Meta kreu shkelje të rëndë kushtetuese me dekretin për anulimin e zgjedhjeve lokale të 30 qershorit.
Takimin e fundit ata e kishin lënë më anëtarët e komisionit hetimor parlamentar, edhe pse një ditë më parë ekspertët e Venecias kishin pasur një drekë në vilën qeveritare 31.

Në përfundim të takimit me anëtarët e Komisionit të Posaçëm të Komisionit Hetimor, Kaarlo Tuori, që është drejtues i delegacionit dha përshtypjet e para mbi takimet e zhvilluara. “Jemi të kënaqur me takimet e zhvilluara në Tiranë. Kemi marrë informacione të mjaftueshme lidhur me atë që kërkonim. E kemi një ide të qartë, nëse e ka shkelur apo jo Presidenti Kushtetutën. Të gjitha takimet kanë qenë produktive, pasi morëm shumë informacion për të krijuar opinionin që do të dalë në 11 Tetor”, tha Tuori.

Kryetari i komisionit hetimor Ulsi Manja tha pas bisedës gati një orëshe me delegacionin e Komisionit të Venecias se kanë diskutuar në lidhje me objektivitetin e trajtimit të kësaj çështje nga ana e Komisionit Hetimor. “Ndamë pikëpamjen që Komisioni Hetimor dhe Komisioni i Venecias do ta trajtojnë këtë rast në aspektin ligjor duke u nisur nga parimet dhe standardet më të larta profesionale dhe kushtetuese dhe me objektivitet maksimal , me qëllim vendosjen e një tradite juridike parlamentare të parin në llojin vet për Shqipërinë”, theksoi Manja.

Delegacioni i Venecias mësohet se është takuar edhe me përfaqësues të shoqërisë civile në Shqipëri.

Për dy ditë delegacioni i ftuar me kërkesë të Kuvendit është takuar me drejtues të opozitës brenda dhe jashtë Parlamentit, drejtues të mazhorancës parlamentare, si dhe me presidentin Meta, kryeparlamentarin Ruçi, kryeministrin Rama, ministrin e Brendshëm, Lleshaj dhe anëtarët e Komisionit Qendror të Zgjedhjeve.
Nxjerrja e raportit të deklaruar në sesionin e 11 tetorit mund të shkaktojë ndërkohë edhe shtyrjen e afatit të komisionit të posaçëm hetimor i ngritur me 55 firmat e deputetëve të mazhorancës parlamentare. Afati i këtij komisioni është 8 tetori dhe kjo pritet të ndikojë edhe në miratimin e raportit të posaçëm që do t’i paraqitet Parlamentit për miratim, nëse do t’i kërkohet shkarkimi ose jo i presidentit Ilir Meta.