.png)
Gazeta Si – PSG-Gonçalo Ramos: tani është zyrtare. Sulmuesi portugez është lojtari më i ri i parisien, huazim për një vit dhe më pas detyrim blerjeje për 65 milionë euro, plus 15 bonuse për sulmuesin e vitlindjes 2001.
Ishin të shumtë emrat në listën e drejtuesve të PSG-së, nga Vlahoviç tek Osimhen dhe Kejn, në fund u zgjodh i riu portugez, ai me koston më të ulët. Bëhet fjalë për blerjen e 8-të të klubit francez për këtë verë, pas Shkriniar, Asensio, Ugarte, Le Kang-In, Lukas Hernandez, Cher Ndour e Arnau Tenas.
🗣💬 « Maintenant, c'est à toi d'écrire l'histoire du Paris Saint-Germain ! »#WelcomeGonçaloRamos pic.twitter.com/Ec8afXyNFj
— Paris Saint-Germain (@PSG_inside) August 7, 2023
Gonçalo Ramos është një nga qendërsulmuesit më premtues të Europës. Ai ra në sy vitin e fundit, si me Benfikën, ashtu edhe me Portugalinë. I fortë fizikisht dhe i shpejtë, ai numëron 47 ndeshje, 27 gola dhe 12 asiste sezonin e shkuar, kur shkëlqeu edhe në Botërorin e Katarit me një tripletë ndaj Zvicrës. PSG bën kështu një goditje për të tashmen dhe të ardhmen.
Vendimtar për blerjen e Ramos ishte Luis Kampos, drejtori sportiv i PSG-së, që e njeh shumë mirë futbollin portugez. Ai e kishte vënë në shënjestër sulmuesin përpara se të shpërthente.
Tashmë pritet efekti domino në lidhje me sulmuesit e klubeve të mëdha. Vendi te PSG është zënë, ndërsa Bajern Mynih dhe Juventusi pritet të bëjnë tashmë lëvizjet e tyre. Totenhemi ka refuzuar edhe ofertën e fundit të bavarezëve prej 100 milionë eurosh për Herri Kejn. Kjo do të thotë se klubi i madh gjerman mund të kthejë sytë nga Vlahoviç.
Në anën tjetër, Juventusi kërkon ta sistemojë sa më parë serbin për t’i hapur rrugën blerjes së Romelu Lukakut. Në bisedimet mes klubeve kishte një ide për shkëmbimin e dy sulmuesve, por trajneri i Celsit, Mauricio Poçetino, nuk duket shumë i bindur nga Vlahoviç.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
